Ich Ott von Charennspach vergich offennbar vnd tuen kundt, daz ich geben han durch meiner seel hail vnd durch aller meiner vodern seel willen, dem gotshaws vnd der samnung zu Pawngartennberg meines rechten freyen aigenns di guet, die hie benannt sind. Von erst den hof datz Weisching vnd ain hofstat leit vor demselben hof, vnd ein hofstat leit auf dem Hart datz dem Weitschachen, vnd datz Zaglaw ein lehn also beschaidenlich, das die herren von den vor genantn guetern ja^erlich meinen jartag begeen sullen ewigclich, als an dem brief verschriben ist. Von erst sullenn sy des montags nach Mitteruasten tailen vnd geben vndter arm lewt ain maisen (sic) h/aering vnd prot, was aus vier und dreissig metzn korns werden mag, vnd sechs emer wein ewigclich an allen verzug. Vber das alles sol man den herren geben in das Refent ia^erlich an demselben meinem jartag ein halb phundt pfenning vmb visch, darumb sy meinen vnd meiner vodern jartag begeen sullen an demselben tag mit vigili vnd mit messen, als gewonhait ist jnn irem orden. Wa^er das aber getan, das mir die vor genanten herren vnd der conuennt meinen jartag nicht begienngen mit der tailung vnndter arm lewt vnd auch in selben in das Refennt, als vor verschriben ist, so sullen sich mein nagst erben vnd mein nagst frewndt der vor genannten gueter vnndter ziehen so lanng, vntz das dieselb sawmchait gepessert werd mit gueter gewissenn, so sind den herren dann dieselben güeter wider ledig als vor an allen chrieg. Vnd alles das gut, das ich in geben han oder noch kunffticlich gib, das sullen sy haben mit alle dem rechten, versuecht vnd vnuersuecht, als ich es selb emalen gehabt han in rechter stiller aigner gwer, dann als vil, das sy khain stewer von denselben gueten vnd von den lewten, die darauf sitzennt, nymmermehr hinfürbas nemen sullen vnd auch annder nyemand. Vnd darumb, das die red sta^et vnd vnuerkert beleib, darüber gib ich den herren vnd dem gotshaws zu Pawngartennperg den brief versigelten mit meinem anhangunden innsigel vnd mit meines vettern innsigel Otten der Pernawer vnd mit meiner ohaim der Flahenegker hern Gotschalchs, Chunrats vnd Ottenn insigl, mit der will die sach geschehen ist vnd die auch mit jren anhangunden insigl der wandlung gezewg sind. Der brief ist gehen nach Christi geburd drewtzehen hundert iar vnd darnach in dem suben vnd viertzigisten iar des sambstag vor dem Vaschanngtag.

Source Fulltext: OÖUB 7 (Wien 1876) S. 7f., Nr. 7