Ich Alber der Volckennstorfer von Krewtzen vergich offenwar, das ich mit guetlichem Willen meiner hausfrawen frawen Margreten vnd Otten meines suns vnd seiner erben vnd auch mit willen meins aydens Albers von Czelking vnd auch seiner hausfrawen meiner tochter frawen Minntzla vnd jrer erben vnd auch mit gunst aller meiner erbenn, wie die genannt sind, geben han lediclich denn geistlichen herren zu Pawngartenberg zu einem ewigen seelgera^et mir vnd aller meiner vodern seel zue hail vnd zu trost meins freyen aigen, das mich angeuallen ist zu rechter fürzicht getailt von meinem bruder her Hadmadrn (sic) von Volckenstorf vnd von seinen erben, zwen ho^ef, der ain haist ze Rorueld, der annder ze Drachssling mit alle, vnd darzue geho^ert versuecht vnd vnuersuecht, als jeh sy selb gehabt han in rechter stiller aigenns gwêr. Der hof zu Rorueld dient jaehrlich sechs pfunt wiener phenning ye zu der quottember zwelf schilling alter phenning wiener müns. Vnd vmb denselben gelt vnd auch sunderlich durch der lieb willen, die die vorgenannten herren zu mir habent, habent si sich gen mir verpunden zu ainer mess alle tag an widerlos ewigclich ze sprechen in meiner cappellen ze Portenn also beschaidenleich, welicher herr des conuennts meines spitals phleger vnd ambtman ist, der sol dye vor genannten sechs phund järlich einnemen vnd sol dann dem briester, der in der vor genannten capelln mess spricht, all tag drey phenning geben vnd dem, der die mess sprechen ho^ert vnd darzu hilft, dem sol er auch ta^eglich einen phenning geben. Der annder hof ze Dra^echssling, der auch wol sechs phund gelts ist, den hab ich auch den offt genannten herren geben ewigklich ze haben, als ich in selbs gehabt han, als vor geschriben steet, also beschaidennlich, welicher herr des conuents meines spitals phleger vnd ambtman ist, der sol denselben hof jnnhaben, vnd sol der samnung dauon geben vier dienst ga^enntzlich an wein, an prot vnd an vischen die vier sambstag in den vier quottembern yeglicher dienst von zwelf schilling vnd sullen auch desselben tags vier arme mensch sunderlich gespeist werden also, das sy ir notturfft an essen vnd an trincken wol gehaben mu^egen. Vnnd darumb hat sich die vor genannt samnung gen mir verlu^ebt vnd verpunden ze sprechen ewigklichen an den vor genannten vier sambstagen yeglichs sambstags vier mess, die erst von der heiligen Driualtigkait, die annder von Vnnser Frauen, die dritt von sannd Johannsen dem Evangelisten vnd ain collecten von sannd Johanns dem Tauffer in derselben mess, die vierdt mess von den todenn. Wurd aber mir das verzogen, das die herren saumig wêren vnd nicht volfu^erten als, das vorgeschriben ist, so sullen sich mein na^egst erben vnnterziehen der vor genannten ho^ef, ob von in baiden verzogen wurd, das dauon geho^ert zu tuen, oder der ho^ef ains, von welichem nicht gescha^ech, da dauon zu tuen ist, als vorgeschriben ist, darzu offen ich mer, ob das gescha^ech, das ich got nicht getraw vnd das got nicht enngeb, das mein spitall nicht ainen fürgannckh gewinn, so sol die vor genannten hof jnnhaben vnd dienst dauon vessenn, wer der offt genannten herren pitanntzer ist, vnd sol auch dauon raichen vnd geben den herren als, das vor benannt vnd beschriben ist. Ich bin auch vnd all mein erben der vor genannten zwaier ho^ef des gotshauss vnd der herren ze Pawngartenperg nach lanndes recht an allen jren schaden gwêr. Darzu offenn jch mer, das ich vnd mein erben derselben ho^ef vogt sullen sein des offtgenannten gotshauss lautterlich durch got an allen schaden vnd an alles geuerd. Ta^et wir dem gotshaws darüber vngueltlich an der vogtey mit kainem gewalt oder mit kainer vnrechten vodrung, zuhannt sey wir gefallen vnuerschaidennlich an all wider red vonn der vogtey vnd sullen sy dann die vor genannten ho^ef jrem vogt emphelhen, der annders ires guets scherm ist an des lanndsfürsten stat. Es sullen auch mein nagst erben, vmb weliche sawmchait sy sich der ho^ef baider oder jr ains jnnderziehennt, der nicht lennger jnnhaben, vntz das die sawmchait gepessert wird, so sind dem gotshaws vnd den herren dieselben ho^ef baid wider ledig an allen krieg vnd geuêr als vor. Vnnd darumb das di red sta^et vnd vnuerkert beleib, darüber gib ich den offt genannten herren die hannduest versigelte mit meinem anhangunden innsigel vnd mit meines suns Otten innsigel vnd mit meines aiden innsigel Albers von Czelking, mit der willen vnd gunst die sach| geschehen vnd gewanndelt ist. Der brief ist geben nach Christs geburd dreyzehen hundert jar vnd darnach in dem acht und viertzigisten iar an Vnnser frawen tag, als sy geborenn ward.

Source Fulltext: OÖUB 7 (Wien 1876) S. 64ff., Nr. 70