Ich Jo^erg von Hersdorf vnd ich Margret sein hausfraw veriehen offennwar vnd tuen khundt allen den, die den brief sehennt oder ho^erennt lesen, das wir mit wol bedachtem mut vnd mit guetlichem willen aller vnnser erben, wie die genant sind, vnd auch nach rat vnnser besten frewndt zu der zeit, do wir es wol getuen mochten, geben haben den geistlichen herren ze Pawngartenperg vnnsers rechten freien kaufaigenns ainen hof, haist an dem Aigen vnd ain hofstat haist an dem Gusslein gelegen in Sand Michels pfarr vnd dienent zwelif schilling Wiener pfenning, sechs schilling auf Sand Jo^ergen tag vnd sechs schilling auf vnnser Frawen tag in dem herbst, mit allen den rechten vnd nutzen, als wir sy selber emalen gehabt haben, also beschaidennleich, das wir dieselben gu^ellt sullen haben vntz an vnnsern tod, vnnd sullen darüber ja^erlich den herren dienen sechtzig Wiener phenning an Sand Jo^ergen tag in jr pitanntz von den vor geschriben güetern ze vrchund, das sy derselben güeter damit bey vnnsern lembtigen zeiten mitsambt vns sullen an der gwer sein. Vnd wann wir dann baide nymmer sein, so sullen dieselben güeter lediclich dienen mit allen nutzen versuecht vnd vnuersuecht der samnung in jr pitanntz vnd sullen sy dann vnnsern jartag begeen ja^erlich ainst in dem jar, Wann got vber mich egenannten Jo^ergen gepewtt, an demselben tag sullen sy vnnser baider iartag begeen, als gewonhait ist in jrem orden. Vnd sol der pitantzer an demselben tag den herren geben in das refennt ain ganntz dienst, was die zwelff schilling getragen mügen, zu einem ewigen seelgerêt mir vnd meiner hausfrawen vnd auch allen vnnsern vodern. Vnd darumb haben sich die herren gen vns verpunden, wann got vber vns gepewtt, vnd wo wir sterben zwischen Wienn vnd Passaw, da sullen sy vns nemen vnd sullen vns bringen zu jrem closter mit jr aigner fuer vnd sullen vnns dann mit jrer geistlichen arbait, das ist mit vigili singen vnd mit selmessen helffen jn vnnser grab, als sy es anndern erbern lewten begeend nach irs ordens gewonhait. Wir sein auch vnd nach vns vnser erben der vor benannten zwaier guet, der herren vnd des gotshawss gwêr, scherm vnd vogt lautterlich durch got. Ta^et wir den armen lewten darüber vnguetlich, vnd wolten sy beswa^ern mit gwalt oder mit vnrechter vodrung, da sullen vns die egenanten herren vmb ze red setzen. Vnd ist, das wir das wider tuen, des sol sy genüegen. Gescha^ech aber des nicht, so sullen sy dieselben guet ainem andern vogt emphelhen, wem sy wellen, mit vnnserm guetlichem willen. Darzu offen wir, ob das gescha^ech, das die herren sawmig weren vnd nicht volfüerten rechtlich vnd genntzlich als, das vorgeschriben staet, so sullen sich vnnser nagst erben der e genannten güeter wider vnndterziehen jn an frum, vnd den herren an schaden vnd sullen die jnnhaben so lang, vntz die sawmichait gepessert werd. So sind den herren dann die guet wider ledig als vor an allen krieg vnd an alle widerred. Darumb das die red sta^et vnd vnuerchert beleih, darüber gib ich jn den brief versigelten mit meinem anhangunden innsigel vnd mit meins brueder innsigel Chunrad von Aurach vnd mit meins swager innsigel Wolffharts des Gullen, die der sach damit gezewg sind. Der brief ist geben, do man zahlt von Crists geburd drewzehen hundert jar, darnach in dem newn vnd viertzigisten jar des montags in der ersten vasstwochen.

Source Fulltext: OÖUB 7 (Wien 1876) S. 96ff., Nr. 99