Ich Albrecht der Talinger von Talarn vergich offenwar vnd tu^en kundt allen den, die den brief sehennd oder ho^erennd lesen, das ich mit wolbedachtem mu^et vnd mit guetlichem willen meiner hausfrawen frawn Chunigunten vnd meins suns Vrschalhens vnd aller meiner erben, wie die genant sind, vnd auch nach meiner pessten frewndt rat verchaufft han abbt Reicharten vnd dem gotshaws vnd der samnung ze Pawngartnperg meins rechten freyen aigens ain mu^el, haist in der Aw, mit allen den nutzen vnd rechten, die darzu geho^erend ze veld, ze holtz, ze wismad, versuecht vnd vnuersuecht, als ich dieselben mu^el in der Aw in rechter stiller aigenns gwer vnd vnuersprochen her han pracht jnner jar ennvollen, vmb an ains funfftzig phund wiener phenning, der ich vnd mein erben gantz vnnd gar verricht vnd gewert sein an alln schadn. Ich bin auch vnd all mein erben gwer der vor genanten mu^el des gotshawss vnd der herrn zu Pawngartnperg, wo des durft geschiecht, nach lannds recht jn O^esterreich. Gieng aber den egenanntn herren vnd dem gotshaws daran jcht ab mit recht, das sullen sy haben auf aller der hab, die ich vnd mein erben haben, vnd sullen auch desselben schadens, den sy nemend mit recht an der gewerschaft, becho^emen von aller vnnser hab an clag vnd an allen verzug mit meinem vnd mit aller meiner erben guetlichem willen, wo sy darauf gezaigen mu^egen, es sey auf lannd oder auf wasser. Es leit auch diselb mu^el, die ich den egenannten herren ze kauffen han geben, in der Aw bey der Na^erden in Erwinger pfarr. Vnd darüber das die red vnd der chauf sta^et vnd vnuerchert beleib, darüber gib ich den egenannten herren vnd dem gotshaws zu Pawngartenperg den brief versigelten mit meinem anhangunden innsigel vnd mit meins ohaims innsigel hern Wetzleins von Erwing vnd mit hern lorenntzn des o^eder innsigell zu den zeitn landtrichter in dem Machlannd vnd mit hern Gotschalichs vnd Chunrats vnd Ottn der Vlachennecker innsigeln, die all des chauffs vnd der wandlung mit jren jnsigeln gezewg sind. Der brief ist geben nach christs geburd drewtzehen hundert jar, darnach in dem newnundviertzigisten jar jnn der Antlaswochen.

Source Fulltext: OÖUB 7 (Wien 1876) S. 104f., Nr. 106