Wir abpt Christan ze Paumgartenperg vnd di samnung daselbs gemain vergehen offenbar vnd tvn chvnd allen den, di den prief sehent lesent oder ho^ernt lesen, daz vns der edel erwirdig herr her Jans von Chappell vnser vokt durch der trew^en willn, di er zv vns vnd zv vnserm gotshaus hat vnd auch im selb vnd seinn nachcho^emen zv einem ewigen selgeraet geben hat die gotsgab vnd di chirchen ze Gvmppendo^vrf mit allev dev, vnd dar zv^e gehört also beschaidenleich, daz auf derselben chirchen datz Gvmppendörf zwen priester vnsers ordens auz vnserm chloster ewichleich sitzzen schvllen vnd auch verbesen mit dem gotsdinst. So offen wir auch mer, daz wir vns verpunden haben an dem prief mit vnsern trew^en, zwo mess ewich-leichen ze sprechen tegleich in der chappelln, do sein vater seliger her Vlreich von Chappelln inn bestat ist, vnd waz in der selben chappelln ze pezzern ist an messgwannt an pv^echern an altertüchern an glasern an daechern, daz schullen wir allez pezzern. Wann wir daran savmig wern vnd wir darnach gemant wurden vnd nach der manvng yber ain mönat nicht volzvgen allez daz, des wir vns mit vnsern trew^en verpunden haben vnd daz an dem prief geschriben stet, zehant so schol sich der vorgenant edel herr her Jans von Chappell oder nach im sein erben der offt genanten chirchen ze Gvmppendorf vnderwinden vnd vnderziehen mit vnserm gütleichem willn, vnd waz wir darauf verpawt oder geleit haben, daz schvllen wir vor auz verlorn haben. Dar zv so tun wir mer chvnd, daz der selb edel herr her Jans von Chappell vnd nach im sein erben der vor geschriben chirchen datz Gvmppendörf ewig vökt schvllen sein, als si des prief habent mit dem grozzen insigel von vnserm gnaedigen herren dem höcgeparn fvrsten hertzog Albrechten ze Osterreich. Darvmb, daz dem vorgenanten edeln herren hern Jansen von Chappell vnd seinn erben di red vnd di wandlung stet vnd vnuerchert beleib von vns vnd von den, di nach vns choment, geb wir in dem prief zv einem vrchvnd der sach versigelten mit vnsern paiden anhangunden insigeln, vnd zv einen gezevg mit vnsers weiser abpt Chvnrats von dem heiligen Chrevtz anhangunden insigel. Der prief ist geben nach Christs pv^erd vber drevtzehen hvndert jar, dar nach in dem vier vnd fvmftzkisten jar an dem prehentag.

Source Fulltext: OÖUB 7 (Wien 1876) S. 343f., Nr. 336