Ich Janns von Chappelln vergich offenwar vnd tuen kundt allen den, die den brief sehennt, lesennt oder ho^eren lesen, das ich mit wol bedachtem muet vnd mit meiner su^en Vlreichs vnd Eberharts guetlichem willen vnd mit gunst aller meiner erben geben han den geistlichen lewten dem abbt vnnd dem conuennt zu Pawngartenperg lautterlich durch Got vnd mir selben vnd meinen vodern vnd meinen nachkomen zu einem ewigen seelgerêt die gotzgab vnd die kirchen datz Gumpenndorff ewigclich ze haben mit allem dem, vnd darzue geho^ert also beschaidenlich, das auf derselben kirchen zu Gumpendorf zwen briester jrs ordenns aws jrem closter ewigclich sitzen sullen vnd auch dieselben kirchen mit dem gotsdienst verwesen sullen. So offenn ich auch, das sich der abbt vnd der conuennt gen mir verpunden habent mit jrem brief vnd mit jrs weiser brief des abbts von dem heiligen Krewtz zwo mess ewigclich ze sprechen teglich in der capellen, do mein vatter seliger her Vlreich von Cappelln jnn bestatt ist. Vnd was in derselben Capellenn zu bessern ist an messgewannten an puechern an altartu^eechern an glesern an dechern, das sullen sy alles bessernn, vnd wann sy daran sewmig weren vnd darnach vmb die sawmichait gemant wurden vnd nach der manung vber ein monat nicht volfüerten vnd volzugen alles das, des sy sich gen mir verpunden habent vnd das an dem brief geschriben steet, den sy mir geben haben mit jren baiden anhangunden innsigeln vnd mit irs weisers des abbts von dem heiligen Krewtz anhangunden innsigel, ze hannt sol ich mich oder nach mir mein erben der offt genanten kirchen datz Gumpenndorf vndterwinden vnd vndterziehen mit irem gueten willen. Vnd was sy darauf verpawt oder geleit haben, das sullen sy voraus verloren haben. Ich sol auch vor genanter Jans von Chappelln vnd nach mir mein erben der vor genanten kirchen ze Gumpendorf ewiger vogt sein, als wir des brief haben von in vnd von jrm weiser dem abbt von dem heiligen Krewtz vnd von vnnserm genedigen herren dem hochgeborenn fu^ersten hertzog Albrechten von O^esterreich. Darumb, das den erbern geistlichen lewten dem abbt vnd der sammung zu Pawngartenperg vnd iren nachkomen die red vnd die wanndlung steet vnd vnuerkert beleib von mir vnd von meinen erben nach mir, gib ich in vorgenanter Jans von Chappelln den brief zu einem vrchundt vnnd zu einem gezewg der sach vnd der wanndlung, versigelten mit meinem anhangunden insigel vnd mit meiner baiden su^on Vlreichs vnd Eberharts anhangunden innsigeln. Der brief ist geben nach Christs geburd dreutzehen hundert jar, darnach in dem vier und funffzigistem jar an dem prehentag.

Source Fulltext: OÖUB 7 (Wien 1876) S. 342f., Nr. 335