Ich Sophey Herweigs tochter des Enngelpolzstorfer von Hard dem Got genad, vergich offenwar vnd tu^en chundt allen den di den prief ansehent lesent oder ho^eren lesen, das ich meines vatterlichen erbs das mich ist angeuallen zu rechter fürzicht getailt vonn allen meinen geschwistreden vnd das mein freyes aigen gewesen ist, mit aller erben wie die genannt sind guetlichem willen vnd nach meiner besten frewnt rat versatzt han dem gotshaws zu Pawngartennperg einen hof gelegen datz Eytzenndorff vnd einen ackher der jn denselben hof geho^ert da man zwen phenning von dient zu rechtem purckrecht iaerlich an sand Jo^ergenntag, vnd auch mit alle dew vnd in den vor genannten hof geho^ert, versuecht vnd vnuersuecht, vmb achtzig phund wiener phenning, die ich alswo han zu pesserung angelegt vnd der ich gantz vnd gar gewert pin zu rechten ta^egen an allen schaden. Es ist auch desselben satz ja^erlich losung an sand Jo^ergenntag. Ich bin auch desselben satzs gewer fu^er all ansprach als satzs recht vnd lanndtrecht ist in O^esterreich. Vnd was dem gotshaws daran abgieng mit recht, das sol der abbt vnd die samnung daselbs haben auf aller der hab die jch han vnd ich künffticlich gewynn jch sey lebentig oder tod. Darumb das dise red sta^et vnd vnuerchert beleib, verpint ich mich vndter meins brueder jnnsigel Vlreichs des Ennglpoltstorffer vnd vndter meiner swa^eger innsigel Ottenns des Lengawer vnd Pemschens des Schenncken von Scho^ennperg, wann ich aigenns jnnsigels nicht ennhan. Darzu han ich gebeten die edlen herren von Cappelln hern Vlrichen vnd hern Eberharten zu zewg mit jren jnnsigeln, vnd meinen ohaim Otten den O^eder der ze den zeiten lanndtrichter was in dem Machlannd mit seinem jnsigel, vnd meinen ohaim Hainreichen den Fleischessen von dem Stain vnd Leupoldenn den Stainrewter die baid dabey gewesen sind da ich vnd meine geschwistraid von einander getailt haben zu rechter fu^erzicht die ir jnnsigl auch an den brief gehanngenn haben. Der brief ist gebenn nach Christ gepurd drewtzehen hundert jar darnach in dem sechs und funfftzigistenn jar an vnnser frawen tag als sy geborenn ist.

Source Fulltext: OÖUB 7 (Wien 1876) S. 474f., Nr. 467