Ich Nychlas der Lange in dem teuffen graben ze Wyenne und ich Hainreich des U^edunchs sun saelig zu den zeitn paid zechmayster und wir die zechbrueder gemain der fleischaker zech ze Wyenne vergehen offenleich an disem brief, daz wir von des gebotts wegen so unser genaediger her der edel hochgeborn furst herczog Rudolf ze O^esterreich ze Steyr und ze Kernden in der stat ze Wyenne umb gruntrechts und pu^erchrechts ablosung gebotten und autgesaczt hat, recht und redleichen abzelosen geben haben dem erberm geystleichem herren brueder Symann zu den zeiten hofmayster der erbern geystleichen herren hous von Pawngartenperg gelegen an dem allen Fleischmarcht ze Wyenn ze nast hern Hainreichs hous von der Neyzze die vierczig wyenner phenning gelts pu^erchrechts die wir und die vorgenante unser zech auf dem egenantem hous der selben geystleichen herren von Pawngartenperg gehabt haben, umb an zehen ayndlefschilling wyenner phenning dew uns der vorgenant brueder Syman gancz und gar gewert bat also, daz die obgenanten geystleichen herren gemain ze Pawngartenperg und alle ir nachkomen und alle die die daz egenant hous von irn wegen oder nach in inne habent und besiczent, der vorgenanten vierczig pbenning gelts sulln furbas ewichleich aller ding darab ledich und frey sein und die davon nicht mer dienn. Unnd sulln auch wir noch unser nachkomen zechmayster noch zechbrueder der vorgenanten fleischakerzech noch ander nymant von unsern wegen weder mit briefen noch an brif noch mit chainerlay sachen wie so die genant sint, auf daz egenant hous umb die egenanten vierczig phenning gelts furbas nymmer mer chain ansprach noch chain vodrung haben noch gewinnen weder vil noch wenich. Waer aber daz furbas icht brief oder urchund fu^erpracht wurden, von swem daz waer die auf daz vorgenante hous umb die egenanten vierczig phenning gelts sagten, die selben brief und urchund sulln denne gaenczleichen tod und ze nichte sein und chain chraft mer haben weder chlain noch gro^ezz, und daz disew ablosung furbas staet und unczebrochen beleib und wand wir vorgenenten ich Nychlas der Lang und ich Hainreich des Udunchs sun selber nicht aygener insigiln enhaben, daruber so geben wir fu^er uns und fu^er die zechbrueder der vorgeschriben fleischakerzech gemain und fu^er alle unser nachkommen in disen brief ze einer waren gezeugnuzzen diser sache versigiltn mit der erbern laeut insigiln hern Michels des Chunraeuter und hern Seyfrids des Ammans, die derselben fleischakerzech auch zechbrueder sint und die auch diser sache gezeugen sint mit irn insigiln. Der brief ist geben ze Wyenne nach Christs geburd dreuczehen hundert jar darnach in dem ains und sechczgisten jar des eritags nach sand Ulreichs tag,

Source Fulltext: OÖUB 8 (Wien 1883) S. 36f., Nr. 35