ICH Herwart der Lemperger und ich Gedrawt sein hawsvrawe ich Chunrat der Lemperger sein sun und ich Margret sein hawsvrawe und mit uns all unser erben su^en und to^echter wier verjehen, daz wier durch ehafter no^et willen die uns an ist gelegen gesatzet haben den erwierdigen geystleichen herren apt Jans und dem convent gemain ze Paumgartnperg unserz freyn aygen und unverchumberten gu^ets unsern hof datz Hard mit drin hofsteten die darin gehörnt gelegen in Mitterchircher pharr mit allew die und darzu gehört umb viertzk phunt und umb fümf hundert phunt phenning wienner mu^onnz die sew uns von ierer beschaiden nach unserr grozzen pet berait darauf gelihen habent, und sein auch der gantz und gar gewert an allen schaden; sew schullen auch den satz nutzen und niezzen, alz sew pest mugen, und wann sew wellent, so mugen sew in umb alz vil phenning gesetzen, wem sew wellent. Ez schol auch dez sattzes lösung sein umb die vorgeschriben phenning jaerleich an aller mann vaschang tag und zu dhainer czeit mer, und wann daz ist daz wier oder unser erben lo^esen wellen, waz dann der herren czwen sprechent pei ierer gwissen daz sew auf den hof und waz darzu geho^ert geleit und verpawn haben, daz schullen wier in vorauz widern chern. Daz die red staet und unczebrochen beleib dez geben wier in zu urchund den offen prief versigelten mit mein egenantes Herwartes dez Lemperger anhangunden insigel, und mit mein vorgenantes Chunrates dez Lemperger anhangunden insigel und mit Sighartes dez Presnitzer mein Herwartez dez Lemperger aydem anhangunden insigel; darzu haben wier auch gepeten die edeln erbern herren hern Jansen von Trawen hawpman ob der Ens und auch zden czeiten vogt dez vorgenanten chloster ze Paumgartenperg und hern Otten von Volchensdorf und die erhern la^ewt Ulreichen den Reykenstorfer von Schiltdorf der mein offt genantes Herwartes dez Lemperger swager ist, und Otten den O^eder von Swerperg, daz sew der sach auch getzeugen sein mit iern anhangunden insigeln in an schaden. Der prief ist geben an dem suntag vor vaschangs, do man czalt von Christes gepu^erd drewtzehen hundert jar und darnach in dem czwai und sechtzkistem jar.

Source Fulltext: OÖUB 8 (Wien 1883) S. 64f., Nr. 61