Ich Ulreich der Schauchinger und mein hausfraw und all unser erben verjehen umb das leibgeding, das wir inn haben gehabt von den erwirdigen geistlichen herren und von dem gotshaws ze Pawngartenperg ain hof genant der Kunigshof gelegen in Krewtzer pfarr mit alle die und darzue geho^ert, das mein leibgeding gewesen ist von dem vorgenanten gotshaws und von den herren zu Pawngartennperg zu meinen lebtagen, dasselb leibgeding und all di rechten die ich daran han gehabt das han ich . . . ze kauffen geben den vorgenannten herren ze Pawngartennperg umb an sechtzig V — (fünf) — phund phenning der wir gantz und gar gewert sein an all scha^ed, und haben auch wir und all unnser erben und frewndt noch ander nyemand von unnsern wegen hintz dem vorgenanten Kunigshof hinfür nichts mer ewiclich zu sprechen. Und sein auch wir und unnser erben des kauffs ir gwer und scherm fur all ansprach. Chumbt daruber yemant der in den hof zu krieg tuet das sy scha^edn von nement mit recht, dieselben scha^edn sullen wir in widerkeren an all widerred. Und sullen auch sy dieselben scha^eden und haubtguet auf uns und auf aller der hab die wir haben oder gewinnen, und sullen sein davon bekomen mit unserm guetlichem willen wir sein lebentig oder tod. Des zu urkund geben wir in den offenn brief besigelt mit der erbern anhangunden insigell hern Albrechts des O^eder zu den zeiten landtrichter in dem Machland und hern Leutolds des Stainrewtter, unndter die innsigelt wir uns verpinden mit unnsern trewen alles das sta^et zu halten das an dem brief geschriben ist wann wir selbs nicht aigen innsigels haben gehabt. Der brief ist geben nach Christi geburd drewtzehen hundert jar in dem zway und sibentzigisten jar an sannd Gilgen tag.

Source Fulltext: OÖUB 8 (Wien 1883) S. 604f., Nr. 603