Ich Wilhalm der Hawser vnd all mein Erben, wir veriehen vnd tu^en chund offenleich mit dem prief, Allen den di in lesent oder hörnt lesen, Daz vns di erwirdigen geistleichen Herren der Apt vnd der Convent gemain datz Paumgartenperg ze lösen habent geben vnsrew drew güter Hye genant, Daz erst genant dez fürrichten lehen, daz ander daz Lehen im Chalmperg, Daz dritt di Hofstat ze Hu^erbenpach, di si manig Jar in saczens gewer von vnsern vordern inn gehabt, vmb daz gelt, So si im gestanden sind, dez sagen wir sew mit dem gegenbu^ertigen prief ledig vnd loz, Also, daz si fürbaz von der güter wegen, von vns oder vnsern frewnten vnd all vnsern Erben gegenbürtigen vnd chünftigen dhain züspruch vnd anweygung haben schüllen, weder mit recht noch an recht, Wer awer daz in fürbaz, von den vorgenanten gu^eter icht chrieg oder ansprach auf erstünd, von wem daz wer mit Recht, ez sey von vnsern Erben oder vnsern frewnten, do si dez schaeden von cho^emen, daz schullen wir in gancz vnd gar aus richten, an all ir mue vnd schaeden. Taet wir dez nicht, wyettann schaden si dez naemen den ir ainer gesprechen mag, pey seinn trewn vngeswarn, den selben schaden schullen wir in gaenczleich ab tün vnd wider cheren, an alle widerred, vnd schullen si daz haben, dacz mir vnd dacz allen meinn Erben, vnd auf aller der Hab, di wir haben, wo wir di haben, vnd gelegen ist, versücht vnd vnuersücht vnd schu^ollen sein do von bechomen, mit vnserm guten willen, An Recht, vnd an fürbot, auf wazzer vnd auf Land, vnd daran schullen wir sew, noch vnser vrew^ent, oder dhain gewaltigew Hant irren, vnd wer in dez hilft, der schol dez gen vns vnd aller ma^enichleich vnentgolten sein, Dez ze vrchund geben wir in den offen prief, versigelten mit mein vorgenants Wilhalm des Hawser Anhangunden Jnsigel vnd dez ist auch geczeug Hainreich der frey mit seim Anhangunden Jnsigel, im an schaden. Der prief ist geben, An sand Stephans Tag im Snyt, Nach Christs gepürd dreuczehen Hundert Jar, darnach in dem Newn vnd Sibenczkistem Jar.

Source Fulltext: OÖUB 9 (Wien 1906) S. 670-671