Wir Albrecht von Gottes genaden hertzog ze Österreich ze Steyr ze Kernden vnd ze Krayn graf ze Tyrol etc. tuen kund vmb alle die recht gnad freyung vnd alte gewonhait, die vnser herrschafft zu der Freynstat von alter gehabt und mit guter gewonhait herpracht hat, das ist, das alle herren ritter vnd knecht pfaffen ambtleut purger paurn juden vnd alle ander, wie die genannt sind, gesessen jn derselben vnserr herrschafft zu der Freynnstat sich nyndert verantburten sullen weder vor vnserm hawbtmann ob der Enns noch vor seinem verweser noch auch in seiner lanntschrann nur allain vor vnserm haubtmann zu der Freynnstat oder vor seinem verweser, wellich dieye zu zeiten sind, vor den sol man all recht suechen||
vnd verantburten. So sol auch dhain vnser haubtman ob der Enns oder sein lanndtrichter weder Christen noch juden jchts gewaltig machen in der vorgenannten vnser herrschafft ze der Freynstat noch auch yemant da anualen vahen noch auch nach^a)||
dhainem vall greyffen jn dhain weg, als das von alter herkomen ist. Wer auch hintz den vorgenannttenn leutten gesessen jn vnserr herrschafft zu der Freynstat oder hynntz jrn||
gutern vnd hab ichts hab gesprechen, der sol das recht darumb nemen vnd suechen vor dem egenannten vnserm haubtmann oder seinem pfleger ze der Freynnstat oder jn der lanndtschrann daselbs. Darumb maynen vnd wellen wir, das es auch fürbas eewiclich dabey beleibe vnd also stet vnd feste gehalten werde, vnd gepieten ernstlich bey vnsern hulden vnserm haubtmann ob der Enns seinem verweser vnd seinem lanndtrichter, wellich die ye zu den zeiten sind, vnd wellen, das sy alle die, die in der vorgenanntten vnserr herrschafft czer Freynstat gesessen oder wie die gnant sind, reich vnd arm bey der vorgenannten vnserr gnad vnd freyung halten vnd beleiben lassen vnd dawider nit tuen in dhain weg, als dieselb herrschafft das von alter hat herbracht. Wer aber darwider tat, das war swärlich wider vns, wann wir maynen, das sy bey irn gnaden vnd irer alten gewonhait beleiben. Mit vrkund dicz briefs, geben ze Wienn an sand Vincency tag nach Cristi gepurd drewczechenhundert jar vnd darnach in dem sechsundachtzigisten iar.

Source Fulltext: OÖUB 10 (Wien 1933) S. 357-358