Wise liute gent den rat, swas diu welt geschaeftes hat, das sol man haissen schriben an, das man hernach gedenk daran. Swer das haisset unde tůt, der ist hernach vor kriege behůt. Darumbe wir abbet Cv^onrat¹ und der convent von Pfaevaers kùndint allen den die disen brief sehent und hoerent^a) lesen, das wir mit gemainem rate und gůtem willen unbetwungenlich ane alle gevaerde unserm lieben frivnde^b) herren und vogget dem hern Hainrich von Wildenberc² und sinen rehten erbon dur fridesamie und besserunge willen unsers gotteshuses habint gegeben en wehsels namen nîun schillinge en werde an korne ze Vilters³ von unsers gotteshuses zehenden ane besezen und enzezen iemerme îm und sinen rehten erbon ze enpfahenne lieblich aigenlich und ledeclich umbe aine mùlie, diu bi dem wege lit under den nusboumen ob der brugge ze Ragaesch⁴. Die hat er uns und unserm gotteshuse umbe die vor genanten nîun schillinge en werde gegeben en wehsels namen iemer me aigenlich ze hên und ledeclich aller ansprach sin und siner rehter erbon. Und swas im alder sinen erbon an den niun schillingen enwerde ze Vilters abegat und gebristet so ist gedinget, das wir und unser gotteshus sunt im alder sinen erbon den vor genanten gebresten us unsers gotteshuses zêhenden ze Wanges⁵ ganzlich ervollen. Gedinget ist och das und gerêt, das er noh dehain sin erbe noh dehain sin man sunt niemer mùlie gewinnen noch gemachon an das wasser das durh Ragaesch rinnet noh gemaln noh nieman betwingen anderswa ze maln wan ze des gotteshuses muelinon^c) ze Ragaesch. Und das disiu gedinge und dierre wehsel alle da vor geschriben stat iemer me ganz und staete belibe und si, darumbe hiessen wir zwene brîeue geliche schriben und die baide mit unseren zwain insigelen und och mit sinem insigellen vesteclich^d) und beschliezen uns und unserm gotteshuse ainen brief und im und sinen erbon den andern brief ze ainer gedenkunge îemer me ze gehaltenne. Dise wehsel und disiu gedinge beschach in dem dorfe ze Ragaesch des iares do tusent und zwâi hundert und aht und ahzec iar waren nah gottes geburt an dem vierden tage ze usgaendem maîen des aht und ahzegosten iares vor den geziugen die hernah geschriben stant: hern Cv^onrat dem degan von Pfaevaers, hern Rv^odolfe von Hardegge⁶ den closterherron, hern Herman dem liupriester von Ragaesch⁷, Hainrich dem kilchherren von Ragaesch, hern Vlrich dem kilchherren von Vrsaerron⁸, hern Hillebrande von Sagaennes⁹, hern Symon Paschellen, Albrehte Schorande, Hainrich Vederspil, Vlrich dem amman von Valendaus¹⁰, Florin Rabivsen, Friderichen von Walastade¹¹, maîer Hainrich von Valens¹², Albrehte von Vaz¹³, Berhtolde von Sekingen¹⁴ und^e anderen biderben liuten vil, den gůt ze gelo^vben ist.

Source Fulltext: UB der südl. Teile des Kantons St. Gallen II/1, Nr. 783, S. 17-18.