Ich Cv^onrat der Linde burger ze Costentz kv´nd vnd vergih offenlich an disem brief, das ich mir vnd minen erben reht || vnd redelich koft hab von dem fromen festen ritter hern Egelolf von Roschach¹ dem jvnger die vogtye ze Lamprehtswile², dv´ || lehen ist von Clingen³, die vogtye ze O^engeshouen⁴, dv´ lehen ist von sant Gallen, vnd dis lút Walthern, Johansen vnd V^olrichen || von Walde⁵ gebrůder, des selben Walthers wip vnd sinv´ kint, Werlin von Wille⁶, V^olin Búrkis vnd sinv´ kint vnd Martin von Nidernhouen⁷, vnd hab die selben vogtyen vnd lút von im koft vmb fv´nf vnd zwainzek pfvnt Costentzer pfenninge mit dem^a) vnd also, das er die selben vogtyen vnd lút mit namen nit wider koffen sol noch mag hinnan^b) ze sant Johans tag des Toffers dem nehsten, der nvˆ kvnt, noch darnach inwendig dryn jarn den nehsten, dv´ darnach koment, vnd wenne er ald sin erben, ob er enwere, mir ald minen erben, ob ich enwere, dv´ selben fv´nf vnd zwainzek pfvnt gebent in dem vierden jar nach den selben^c) dryn jarn, als vor ist beschaiden, vor sant Johans tag des Toffers, so sont inen die selben vogtyen vnd lút mit allem reht ledig sin, wa^er aber, das si v´ns dise selben pfenning gebent in dem selben vierden jar nach sant Johans tag des Toffers, so sont inen aber die vogtyen vnd lút ledig sin, aber der nûtz der selben vogtyen vnd lút sol danne doch das selb jar v´ns werden vnd geuallen, wa^er aber, das sich das selb vierd jar ergienge, das si die vogtyen vnd lút nit wider koffent, wil ich danne darzů komen, so sol er mir ald minen erben sv´ aines pfvndes Costentzer pfenning naher geben danne andren lúten, ane alle geuerd, vnd sol es och danne stân vff Cv^onrat von Hof vnd vff Hainrich dem Linden, was die zwen sprechent, das ich vnd min erben inen hin vss gebent, das sont si von v´ns memen^d), vnd sont v´ns och dannanhin die selben vogtyen vnd lút eweclich beliben. Ich hab och gelobt, das ich von den vorgenanten lúten in den vorgenanten vier jarn nit mê ze stúr sol nemen danne ja^ergelichs zwai pfvnt vnd drye schilling Costentzer pfenninge. Vnd des ze warem vnd offeme vrkv´nd gib ich der selb Cv^onrat der Linde min insigel an disen brief. Der ist ze Costentz geben, do man von Cristes gebúrt zalte drv´zehenhvndert jar, darnach in dem sehs vnd vierzigosten jar, an sant Angnesen abende.

Source Fulltext: Chartularium Sangallense VI, Nr. 3967, S. 500-501.