Allen den, die dizen brieue lesint oder ho^errint lesin, kunde ich Cůnrat der marschalch uon Maenbraehs||houen¹ aine warhait dirre dinge, so hie nah gischriben stâte. Ir sont alle wissin, dc ich mitte hern V^olr. || uon Drupurg² dem kamerer des gozhuses ze sante Gallen vmbe den crieg, den wir mite ainandren hâten || vmbe dc guote ze Rogwile³, des er phligte an des iez ginamptes gozhuses statte, alsus virrihte vnde^a) gischaedin sint, dc ich ime allu iar sol han giwerte ze sante Martis tulte zwelfthalbis^b) muttes kern sante Galler messe vnde zwelfthalbes Schillings phening, dc cînse ist vnde von dem selbin guote ze Rogwile gâte. Waer abir, dc ich den selbin cînse ze dem ê genampten tag nut enwertu, so sol er mir sinen bottin senden, vnde swie ich in^c) denne ze mal nut enweren, so sol er mich^d) ân zorn vnde ane clag phendin uf dem selbin gůte alt uf andren minen guetren, swa ich su han, vnde swas schadin uf die selbin phandung ane giuaerde gat, den sol er uf den selbin phendirn han^e). Och ist dc da girêtte, dc dize schidung vnserm aenwedrem an sinem rehte herna gischadin sol. Vnde dc dize war si vnde veste bilibe, so gibe ich ime dize hantuesti bisigilt mitte minem ingisigil. Dize bischah ze sante Gallen, do von gottis giburte warin zwelfhundert vnde sehs vnde nuncig jar, an dem naehstin samstag nah aller haeligen tag, indic. der cehindin, da zegegin warint . . der porter von sante Gallin⁴, her Eber. von BurgeIon⁵, her R. von Roschach⁶, her Eber. von Bichilnse⁷, her Hainr. vnde her Cůnr. schekin^f) uon Landegge⁸, her Jo. von Schoninberg⁹, her Bur. der vogte von Wartinse¹⁰, die ritter sint^g), Eglolf der alte von Rosinberg¹¹, Jo. von Luterberg¹², H. Meldeli¹³, R. der vogte von Wartinse¹⁴ vnde anderr biderber lute ginuoge.

Source Fulltext: Chartularium Sangallense IV, Nr. 2414, S. 479.