Allen dien, die disen gegenwrtigen brief iemer angesehent alder geho^erent lesen, kvnden wir von gotes gnaden abt Hainrich¹ vnd^a) der conuent aller gemainlich des gotzhus ze sant Gallen, das fvr || vns kam ain erber man Hainrich der Ome² vnsers goteshus dienstman, vnd vmb siner sele gelvke vnd och hail do gab er vns vnd vnserm gotzhus vf dv pfender, dv hie nah gescriben stant vnd dv im von || vnserm vorvarn seligen abt Wilhalm³ versezzet waren, als an dien brieven⁴ gescriben stv^ont, die er dar vmb von im hait^b), vs dem ampt ze Wittabach⁵ drv pfunt vnd siben Schilling || pfenning geltes vnd zehen malter habern geltes vnd vs dem hove ze Gossowe⁶ sehs Schilling minre den drv pfunt pfenning geltes vnd fvnf mvt kernen geltes, vnd die selben gvlte, die der vor gescriben Hainrich der Ôme von vnserm goteshus vnz har ze pfande het gehebt, die lvhen wir im vnd siner elicher vrowen vron Katherinvn zainem rehten lipgedinge mit der bedinge, dv hie nah gescriben stât^c), ob das bescheh, das der vor gescriben Hainrich enwere ê sin elichv vrowe, das denne vns vnd vnserm goteshus lidik son sin die sehs Schilling minr den drv pfunt geltes vs dem hove ze Gossowe, vnd die vbrigen gulte die sol dv vor gescriben vro Katherin niessen vnz an ir tot vnd son och denne dem goteshus ledik sin, so si enist, vnd das dis ware si vnd stete belibe, so geben wir dem vor gescriben Hainrich vnd siner vrowen disen brief besigelt mit vnsern insigeln zainer steten bewervng aller der dinge, so an disem brief gescriben staint. Ich der vor genant Hainrich der Ôme vnd vro Katherin sin||
elichv wirtin veriiehen och ain ganze^d) warhait aller der dinge, so an disem brief gescriben sint, vnd dar vmb so henk ich Hainrich min insigel vnd mins brvder Egelolfs⁷ an disen brief zainem weren vrkvnde dir veriiht. Dirre brief wart gescriben vnd gegeben in sant Gallen stat des iares, do man zalt von gotes geburt drvzehen hundert vnd nvn iare, an aller hailgen abunt, da zegegen waren die erbern gezvge, die hie nah gescriben sint, her Walther Lesti, maister Joh(an)s der Schv^olmaister, Lvtholt der schenk von Landeg⁸, Joh(an)s vom Tos⁹, Gerwik der Paiier¹⁰, Co^vnrat der Kvchimaister¹¹, Joh(an)s der Fvller, Co^vnrat der Blarrer vnd andir biderber lvtin vil.

Source Fulltext: Chartularium Sangallense V, Nr. 2731, S. 171-172.