Dem erwirdigen minem gena^edigen herren abt Herman des gotzhus ze sant Gallen¹ enb(ie)t ich Johans von || Haidelberg² ritter minen willigen dienst in allen sachen. Ich tůn v´ch ze wissent, daz Adelhait Hainrichs in der || Burg burgers ze Biscofzelle³ elichú wirtenn, Amalye vnd Cůnrat iro baider kind, dú selb vrowe vnd irú vor||benempten kind, dú min lehen waren von v´ch vnd von v´werm gotzhus, sich selber mit iro lib vnd gůt von mir vnd von minen erbun gekoffet hant wider an v´ch vnd an v´wer gotzhus ze sant Gallen vmb sehs pfund pfenning gůter vnd gena^emer Costentzer múns, der ich alleklich gewert bin vnd in minen schinba^ern nutz han bewendet, vnd sende v´ch die selbun vrown vnd irú vorgenanden kind ledeklich vf bi Hansen dem Frien burger ze Biscofzelle vnd och mit disem brief an v´wer hand ze dez vorgescriben v´wers gotzhus nutz vnd handen ze rehtem aigen, vnd han och gelobt mit miner trúwe vnd bind och mine erben dar zů mit disem brief, daz wir dez vorgescriben koffes vnd lúte an allen fúrzug vnd ane wider rede reht wern so^ellint sin nach reht, wenn ald wa oder wie dikk sin ir vorgenanter herr abt Herman dez gotzhus ze sant Gallen ald v´wer nachkomen oder daz vorgenant gotzhus ald die vorgescriben lút bedurffent ald notdúrftig sint vff gaistlichem ald vf weltlichem geriht, vnd han mich willeklich gar vnd gantzlich entzigen vnd entzih mich och mit disem brief fúr mich vnd fúr alle min erben vnd nachkomen aller reht vorderung ansprach lehenschaft aigenschaft pfantschatz kuntschaft zúgnúst vnd besatzung, so ich ald mine erben oder nachkomen vmb die vorgenandun Adelhaidun vnd irú kind ie hettunt ald gewnnent ald wir hie nach zů inen immer han ald gewinnen mugint ald mo^ehtint vf gaistlichem ald vf weltlichem geriht ald ane reht dehainen weg. Vnd ze merer sicherhait aller vorgescribener ding henk ich Johans von Haidelberg ritter min aigen insigel an disen brief. Dirr brief geben wart ze Biscofzelle in der stat an dem na^ehsten samstag vor sant Vitus vnd Modestus tag in dem jar, do von Cristes gebúrt warent drútzehenhundert jar, dar nach in dem sehtzigosten jare.

Source Fulltext: Chartularium Sangallense VII, Nr. 4683, S. 501.