Wir Cůn von gottes gnaden abt des gotzhus ze sant Gallen¹, daz ane alles mittel zů geho^ert dem stůl ze Ro^vm, sant Benedicten ordens || in Costentzer bystum gelegen veriehent mit vrkúnd diz brieues, daz fúr v´ns kament der gaistlich herr her Nicolaus von V^otzingen custer || vnd portner² vnsers ietz genannten gotzhus ze sant Gallen ze ainem tail vnd Cůnrat von Ainwille³ mayer des portenamptes vff dem || Rodmonten⁴ vnd anderswa ze dem andern tail, vnd offnoton da, wie si ierrig sto^essig vnd missheilig wa^erint vmb die rehtung, die ain portner vnd ain maiier zů gehortin, vnd baten v´ns flissklich, daz wir offnotin vnd offnen wo^eltint die reht, die daz selb portenampt hêtte vnd alz wir es inne gehebt vnd zwaintzig jar genossen hettent, won si baid tail wol benu^egen wo^elt vnd da bi beliben weltent, waz wir offnotint vnd darvmb saitint, habent wir ir baider bette erho^ert vnd habent o^vch die selben reht vor den lúten, die in das portenampt geho^errent, geoffnot, die och der selben rehten, als wirs offnoton, v´ns gihtig warent vnd gehúllig wurdent, als verre dz si darvmb woltent ainen gelerten aid swerren, wer es nút enbern wo^elt, dz wirs von^a) des portenamptes wegen vnd ain maiier von des mayeramptes wegen also genossen vnd innegehebt hettent, alz hie nach geschriben sta^vt. Des ersten ez sol ain portner rihten vnd sol ain mayer bi im sitzen oder ainer von sinen wegen, wa^er aber, dz ain mayer oder ainer von sinen wegen bi im nút sa^esse, darvmb sol ain portner dester minder nút rihten vnd sol fúr sich vsrihten allermengklich, vnd waz da geuelt von gerihten, des sont zwen tail aines portners sin vnd der dridtail ains mayers. Item wenne ain portner riht, wer denn klegt vmb ain fra^effli, die das blůt an trifft oder ainen nahtscha^vch oder ainen no^vtzog, so sol der portner vrtail fragen vnd sol mit vrtail den stab vsser der hand geben dem mayer oder dem, der von sinen wegen da sitzet, der sol denn rihten v´ber daz blůt, nahscha^vch^b) vnd den no^vtzog, vnd waz da geuelt, des sond ainem portner zwen tail werden vnd ainem mayer der dridtail, vnd la^vt ain portner sin zwen tail varn, so ist der dridtail ains mayers o^vch ab vnd sol im darvmb nieman bitten, dz er im varn la^vss, vnd wenne diz klag vollga^vt, so sol ain mayer oder der, der von sinen wegen da sitzt, mit vrtail den stab aber wider ainem portner geben in sin hand oder ainem, der von sinen wegen da sitzet, vnd aber rihten, als vorgenant ist. Item alz dikk ain portner riht, so sol ain mayer oder der, der von sinen wegen da sitzet, bi ainem portner enbissen. Item ez sol o^vch ain portner setzen vnd entsetzzen ainen vorster vff dem Rodmonten, vnd hat ain portner noch ain vorster vmb den erschatze mit ainem mayer nút ze schaffent, vnd sol ain vorster den Rodmonten versorgen, alz er welle, dz er von ainem portner nút gestraft werd. Es sol o^vch ain vorster von ains portners wegen gebieten an dz geriht vnd sol o^vch gebieten hêge vnd zún ze machenn vnd ainem portner win ze fu^errent den portenzehenden vnd waz da in dem portenampt ze gebietent ist, daz sol ain vorster tůn von aines portners wegen. Item ez sol o^vch ain mayer a^ellú dú gu^eter, dú in daz mayerampt geho^errent, versorgen, dz si nit wu^est liggent, vnd sol die besetzzen mit des gotzhuses lúten, die darvff sesshaft sigent vnd ainem portner diensthaft sigent, vnd dz er va^ellen vnd erbschaft wartent si zů im nach to^vd, wa^er aber, dz kain gůt wu^est la^eg, von dem selben gůt sol ainem portner nútz abga^vn, won dz der mayer dem portner ga^entzlich sin dienst vnd sin nútze sol vsrihten, die von dem selben gůt sond ga^vnd. Item ez sol o^vch ain portner holtz howen in dem Rodmonten, alz vil er des in sin hus bedarf oder zů dem gotzhus bedarf, vnd hat mit ainem mayer darvmb nút ze schaffent. Item so sol der selb mayer in dem Rodmonten kain holtz howen a^vn des portners vrlob vnd gunst. Item ez mugent o^vch die lút, die vff des portenamptes gu^eter sitzzent, in dem Rodmonten holtz howen ze brennen ze zimbrenn vnd ze zúnent, vnd mag ze den drin hohzitenn ieklicher zwai fůder holtz howen vnd mag die in die statt fu^erren vnd verko^vffen vnd sinem vehe saltz darvmb ko^vffen. Vnd dar vmb dz dis alles war sta^et vnd vnlogenhaft belib nû vnd hie nach, so hand wir vnser insigel offenlich gehenkt an disen brief. Der geben ist ze sant Gallen an sant Barnabas tag, do man zalt von gottes gebúrt drúzehenhundert jar vnd drú vnd ahtzig jar.

Source Fulltext: Chartularium Sangallense X, Nr. 5956, S. 127-128.