Allen den, die disen brief sehent lesent oder ho^erent, tůn wir Margaretha von gottes verhengd a^ebtissenne vnd der conuent gemainlich dez gotzhus ze Maggenow¹ kunt vnd vergehen offenlich^a) || an disem brief fúr vns vnd alle vnser nachkomen, won der êrwirdig herre von gottes gnaden abt Herman vnd der conuent gemainlich dez gotzhus ze sant Gallen vns vnd vnserem gotzhus die || gu^etlichú vnd die gnâd getân hant, daz sie vns die gu^eter, die múli ze Flâwille vnd daz múligůt, den hof, den man nemmet den maierhof ze Flâwille, vnd daz Gupflêhen ze Flawille, den hof ze Êdakswille || vnd den zehenden ze Rossrúti, daz gůt uff der Egge, den zehenden ze Sorendal vnd dez Husenerz gu^etli, daz ze Oberndorf gelegen ist, die Wattwis ze Oberndorf vnd den zehenden ze Gebrehtswille v´ber daz Bachlehen vnd den zehenden úber die Hasahůb ze Gebrehtswille, darúber wir vormalez trager hattent, geben verlihen vnd in vnsern gewalt braht hant ze ainem rehten êwigen zinslêhen, daz wir vnd alle vnser nachkomen ainem hêrren von sant Gallen, wela denn abt vnd herre ist, aller ja^erlich iemermê ze sant Gallen tag drú phunt wahses in sin kamer geben súllent ze zins von den vorgescriben gu^etern vnd niht mê. Dauon haben wir mit gůter vorbetrahtung vnd beschaidenhait mit vnser maisterschaft rât vnd willen dem vorgescriben gotzhus frilich vnd vmbetwungellich ûf geben, alz reht waz vnd alz ez kraft haben sol nu vnd och hie nach iemermê, gar vnd gantzlich alle dú reht, die wir hattent ald haben mohten von kainer slaht sach wegen an dem hof ze Helfenberg vnd an allem dem, daz zů dem selben hof ze Helfenberg geho^eret. Wir habent vns ouch frilich vnd willeklich verzigen vnd verzihent vns mit disem brief fúr vns vnd alle vnser nachkomen aller frîhait vnd allez schirmes gaistliches vnd weltliches gerihtz vnd aller brief vnd hantuestinon, die wir ietz habent ald hernach gewinnen mo^ehten von dem gotzhus ze sant Gallen ald von ieman andern, da mit wir kain reht ald ansprach iemer haben ald gewinnen mo^ehten an dem vorgescriben hof ze Helfenberg vnd an allem dem, daz zů^b) selben hof geho^ert. Vnd dez ze ainem waren vrkúnd vnd sta^eter sicherhait so haben wir vnser vnd vnserz conuentz insigel gehenkt an disen brief. Der geben wart ze Maggenow in dem closter, do man zalt von gottes gebúrt drúzehen hundert jar vnd darnach in dem zwai vnd vierzigosten jar, an sant Mathyas tag dez zwelfbotten.

Source Fulltext: Chartularium Sangallense VI, Nr. 3801, S. 371.