Wir Herman von gottez vnd dez stůls ze Rôme gnaden abt dez gotzhus ze sant Gallen¹ tu^egin kunt vnd veriehent offenlich an disem brief allen, die in sehent oder ho^erent lesen, dz wir vnd v´nser vorgenant gotzhus schuldig sigen vnd gelten súllent dem vesten ritter hern V^olrichen von A^ems² vnd sinen erben, ob er enwe^are, drissig pfunt gůter vnd gene^amer Costentzer pfeninge, daz gůt wir im schuldig worden sigen von dez schaden wegen, den er wilent von abt Hiltpolts von sant Gallen³ v´nsers voruarends seligen wegen genomen hât ze Pregentz⁴, dez schadens er v´ns redlichen bewiset hât. Vmb die selben pfening alle haben wir dem obgenanten hern V^olrichen von A^ems vnd sinen erben ze ainem rehten redlichen werenden pfande geben vnd gesetzt allen den winzehenden, so v´ns vnd vnser aptige angeho^ert, den er v´ns von allen sinen wingarten, die er vff disen húttigen tag, alz dirr brief geben ist, hât zu Husen⁵, ze Haslach⁶, ze dem Mân⁷ vnd ze sant Marien halden⁸ gelegen in dem kilchspel ze Bernang⁹ in dem Rintal, ja^erlichen geben solt vnd vormâlz geben hât von sinem winwachs, den selben winzehenden sol er vnd sin erben alle jâr vnd alle die wile niessen vnd haben, vntz wir inen die obgenanten drissig pfunt Costentzer pfeninge mit samenthafter barschaft nutzlich vnd gar nit gebent noch vergolten haben. Dez ze ainem offenn vnd wârem vrkúnt geben wir abt Herman von sant Gallen dem vorbenempten ritter hern V^olrichen von A^ems vnd sinen erben disen brief besigelt mit v´nserm insigel. Der geben ist zu sant Gallen in dem jâr, do man zalt nâch der gepúrt Crists drútzehen hundert jâr vnd in dem fúnf vnd viertzigosten jâr, zu ingendem aberellen.

Source Fulltext: Chartularium Sangallense VI, Nr. 3917, S. 465.