Henricus septimus divina favente clementia Romanorum rex et semper augustus universis imperii fidelibus in perpetuum. Licet ex suscepto regni gu||bernaculo omnibus imperii fidelibus simus debitores ad iusticiam exhibendam et ad iuris defensionem eorumdem, diligentius tamen viros religiosos oculo benigniori respicere tenemur || et eis suisque, ne graventur indebite, pia sollicitudine providere. Huius itaque rei gratia dilectus fidelis noster Cunradus abbas sancti Johannis in Turtal¹ certam habens fiduciam super beinignitate ac providentia magestatis nostre ad nostram apud Nurinberc² accedebat presentiam et coram testibus subscriptis commisit nobis et ab ipso recepimus advocatiam omnium possessionum^a) ecclesie et cenobio suo attinentium, ut amodo sub omnimoda tuicione nostra ipsam tenere debeamus, promisimus econtra abbati et omnibus eius successoribus ac presenti scripto profitemur, quod eandem advocatiam numquam a nobis et imperio alienabimus ratione infeodationis, obligationis vel cuiuscumque alienationis, sed loco nostri constituemus ibidem advocatum pro tempore vel viceadvocatum, quousque nostre insederit voluntati. Preterea memoratus abbas quosdam homines sub certis terminis constitutos de nostro consensu excepit, videlicet in valle Clostobil³ et Starchenbah⁴, Gebrechinber⁵ et Rotinrisinun⁶ et circa locum et cellam sancti Petri⁷ infra tales terminos residentes: Svindin⁸, Dufin⁹, Sterchinbah¹⁰ et Engilcinberc¹¹, ita quod homines infra prenotatos terminos ab omni exactione et Servitute quantum ad nos liberi sint et immunes, et ad prenotata loca tam nos quam viceadvocatus noster numquam accedemus, nisi predictus abbas vel eius successor duxerint nos invitandum, ut quicquid ibidem fuerit proclamatum pro causis et neccessitatibus dicti monasterii rite peragamus, et quicquid per emendam vel correctionem a dictis hominibus per iudicium haberi potent, media vero pars cedat nobis, reliqua abbati prelibato. Insuper ad instantiam sepedicti abbatis firmiter promisimus, quod a quolibet mansu eiusdem advocatie tam nos quam viceadvocatus noster nichil amplius quam mensuram unam avene, que in vulgari dicitur schêfel, et quatuor solidos annuatim exigamus, quicquid vero per iudicium per totam advocatiam exactum vel conquisitum fuerit, inter nos et abbatem equaliter dividatur. Indulgendo itaque recognoscimus eidem abbati vel eius successori, q(uicquid)^b) ministeriales nostri de bonis suis divine retributionis intuitu duxerint conferendum eisdem, quod ratum habebimus et firmum. Volentes itaque sepefato abbati tamquam bene merito et eius successoribus specialem gratiam exhibere, ipsos in dilectos capellanos nostros recepimus, et cum esse in curia nostra voluerint ad prosequendas ipsorum querimonias vel alia de causa, ipsi cum octo equitaturis ab officiatis curie nostre in expensis neccessariis et honestis plenarie procurentur. Et ut omnia premissa a nobis et successoribus nostris firmiter observentur, presentem paginam sigillo nostre celsitudinis duximus roborandam. Testes, qui interfuerunt, hii sunt: Henricus venerabilis Wormatiensis¹², Henricus venerabilis Eistetensis episcopi¹³, Henricus Augustensis electus¹⁴, Ludewicus illustris dux Bawarie¹⁵, Gerlacus de Butingen¹⁶, fratres de Nifa¹⁷, Fridericus de Druhendingen¹⁸, Eberhardus dapifer et F. eius filius de Walpurc¹⁹, Cunradus pincerna de Winterstete²⁰, fratres de Sumerowe²¹, Henricus de Rafensburc²², Cunradus de Smideuelt²³ et alii quamplures. Datum apud Nurinberc, anno dominice incarnationis millesimo C°C°.XX° septimo, tercio decimo kalendis ianuarii, indictione prima.

Source Fulltext: Chartularium Sangallense III, Nr. 1145, S. 156-157.