Ich Walther von der Hohen Klingen¹ frije lantrichter in Thurgo^vwe tůn kunt mit disem brief, daz ich ze || Hafneren² an dem lantag offenlich ze gerichte sass an sant Peter vnd sant Paulus abende, vnd kam da fúr || gerichte Růdolf der Aster vnd beclegte Walther den Vaissen, do ze mal kam o^vch fúr gerichte her Walther || der Keller von Ailgo^vw³ probst ze dem kloster ze sant Johann in Turtal⁴ sant Benedicten ordens vnd erzo^egte vor an brief vnd insigel, daz er gewisser botte was mit vollem gewalte des abtes vnd des conuentes da selbs, den selben Walthern den Faissen ze versprechenne, als er dem vorgenanten gotshus von aigenschaft sins libes zů gehorti, vnd zo^egte o^vch dar nach brief, daz dem abte zů dem vorgenanten gotshus ze Liehtenstaig⁵ vor dem gerichte geuallen was mit gemainer rechter vrtail, daz Walther der Vaisse gerůwet sitzen solti, vntz sich mit dem rechten befunde, weder der egenante Walther Vaisse durch recht von dem libe sin so^elte des vorgenanten gotshus oder des Asters, vnd zo^egte dar vf der egen(ant) herr Walther ain brief, der wisete, daz der vorgenant Růd. der Aster in dem banne was nach swe^arunge der be^anne, daz sin banbrief niderlaite vnd v´bertraff vnd vernichtote alle ander absoluciones, so der Aster hatte. Vnd nach briefen rede vnd Widerrede do wart ertaillet mit gesamnoter vrtail, daz dú gebott vnd clagen, so Růd. der Aster v´ber Walthern Vaissen vnz vff disen húttigen lantag erclegt hatte, absin súlnt, vnd daz Walther Vaisse gerawet sitzen sol, vntz sich mit dem rechten beuindet, weder er durch recht von dem lib zů geho^eren sol dem vorgenanten gotshus ald Růd. dem Aster. Besigelt nah rehter vrtail mit des lantgerichtes insigel in Thurgo^vw. Geben an dem vorgeschribenen lantag, nach gots geburt drúzehenhundert vier vnd sechtzig iaren.

Source Fulltext: Chartularium Sangallense VIII, Nr. 4945, S. 141.