Ich graue Růdolf von Montfort¹ herr ze Veltkilch² kúnd vnd vergih offenlich an disem brief allen den, die in sehent alder ho^erent lesen, das ich mit gůter vorbetrahtung || han ze ko^vfent geben reht redlich vnd aigenlich Albern Vaisslin von Vadutz³ vnd sinen erben, ob er enwa^er, den lenberzehenden ze Trisen⁴, der wilent Hans || Ammans was vnd gemain was mit dem vorgedahten Albern Vaisslin. Disen obgenanten lenberzehenden mit allen rehten nútzen vnd gewonhaiten, als ich || in vntzher innegehept vnd genossen han, vnd mit aller zůgeho^erd vnd mit allen rehten han ich im vnd sinen erben aigenlich ze ko^vfent geben vmb drithalb phunt phenning vnd vmb zwen schilling phenning alles gůter Costentzer múns, der ich gar nah minem willen von im gewert bin. Ich vnd min erben so^ellint o^vch sin vnd siner erben vmb disen ko^vf vnd lenberzehenden gůt wern sin zů dem rehten, wa es inen notdúrftig wirt an gaistlichem oder an weltlichem geriht. Des ze vrkúnd henk ich min insigel an disen brief. Der geben ward ze Veltkilch an dem fritag nah sant Anbrosien tag in dem abrellen, do man zalt von Cristes gebúrt drúzehenhundert iar vnd ains vnd sehtzig jar.

Source Fulltext: Chartularium Sangallense VII, Nr. 4734, S. 542-543.