Ich^a) Hans Schili genant Mayer von Kalcherren¹ kúnd vnd vergich offenlich an disem brief, als ich das gůt genant die || Obern Gebraiten² gelegen ze Kalcherren mit aller zůgeho^erde ze rechtem erblehen enpfangen ha^vn von den erwirdigen || wisen minen gnedigen herren hern Walthern apt des gotzhuses ze sant Jo^vhann³ gelegen im Turtal in Costentzer bystům || vnd von dem cappittel gemainlich des selben gotzhuses ja^erklich vmb fúnf schilling pfennig Costentzer múnss zinses vff sant Martis tag in den Brůderhof⁴ ze richtend nach des briefs vrkúndung vnd sag, den ich darvmb von den selben minen herren versigelten inne ha^vn, vergich ich fúr mich vnd alle min erben aller mêngklichem, dz die selben min gnedigen herren alle ir na^vhkomen vnd dz obgenant gotzhuse ze sant Jo^vhann ainen wagen weg sond ha^vn iemer mer von V^elis Gamps gebraiten vnd weg, den er inen o^vch geben ha^vt⁵, v´ber das ort ob dem rain anhin gen dem Ho^engeller vntz in den Brůderhof darzů vnd davon darin vnd darvs ze fúrent ze ziehent vnd ze tragent vnd den weg ze wandeln vnd ze brůchent, wie inen denn je vngeuarlich notdúrftig ist vnd fu^eget vnd si bedurffent oder iro pfleger, wer die sind, an iro statt allenart a^vn all geuerde. Vnd sond ich noch kain min erben noch niemant von v´nsern wegen si iro nachkomenn iro pfleger noch ir fůrlút jetz vnd hie na^vch daran nit sumen jerren noch gesumt schaffen in dehain wise lútzel no^vch vil o^vch a^vn all geua^erde.Vnd des alles ze wa^vrem offem vrkúnde ha^vn ich vorgenanter Mayger Hans Schili den obgenanten minen herren allen allen iren na^vhkomenn vnd o^vch dem gotzhuse ze sant Johann disen brief geben vnd fúr mich vnd alle min erben gebetten besiglen mit Jo^vhansen von Hofen landammans ze Rankwil⁶ aigenn insigel, darvnder ich mich vestklich verbunden ha^vn aller diser dingen, das selb insigel ich egenânter Jo^vhans von Höfen landamman ze Rankwil durch siner ernstlichen bett willen vnd o^vch ze vrkúnd dirr sach doch mir vnd minen erben a^vn allen schaden gehenket ha^vn an disen brief. Der geben ward an dem nehsten samstag na^vch v´nser lieben fro^vwen tag ze liehtmisse, do man zalt von Cristes gebúrt drúzehenhundert vnd ahtzig ia^vr, darnach in dem fúnften ja^vr.

Source Fulltext: Chartularium Sangallense X, Nr. 6054, S. 226.