Wir^a) Cůn von gottes gnaden abt des gotzhus ze sant Gallen¹, daz a^vn alles mittel zů geho^ert dem stůl ze Ro^vm, tůn kunt vnd ver||iehent, das fúr v´ns kam der beschaiden Intal Bla^vrrer, den man nemmet Blarrer Sta^ehelli, burger ze sant Gallen vnd offnot vor vns offenlich, wie || er diz nachgeschriben ja^erlich gelt^b) het von den vnd vsser den nachgenempten ho^efen, des ersten zwai pfund pfenning von dem vnd vsser dem hof || ze Gosso^vw², ain pfund pfenning von dem vnd vsser dem hof ze Nidrenburren³, ain pfund pfenning vsser sinem dridtail des hofs ze Appwilla⁴, alles gůter vnd gena^emer Costentzer múns, vnd wa^er daz selb ia^erlich gelt sin lehen von v´ns vnd vnserm gotzhus ze sant Gallen, vnd wo^elt o^vch dz ietz genempt ja^erlich gelt fu^egen vnd machen fro Annen der Blarrerinen closterfrowen in sant Katherinen closter⁵ siner elichen tohter ze ainem rehten lipding, dz sis haben vnd niessen so^elt ja^erlich, die wils^c) lebti vnd nit fúro, vnd batt v´ns gnaden, das o^vch wir vnsern willen vnd gunst darzů ga^ebint. Darvmb verhorten wir do sin ernstlichen bett vnd gabent vnsern willen vnd gunst darzů. Vnd fůgt do der vorgenant Intal Blarrer vnd machot der egenanten fro Annen closterfrowen in sant Katherinen closter siner elichen tohter die vorgeschribenn vier pfund pfening geltz vsser den vorgenanten ho^efen mit vnser hand geta^vt gůt(em) willen gunst vnd verhengde ze ainem rehten lipding vnd in lipdings reht mit so^elicher beschaidenhait, daz die selb fro Anna die Blarrerin die vorgenanten vier pfund pfenning geltz von den vnd vsser den vorgenanten ho^efen in nemen haben vnd niessen sol, alle die wil si lebt vnd in^d) lib ist, vnd sond o^vch die selben, so die ho^ef buwent, der selben fro Annen Blarrerinen die vorgenanten vier pfund pfenning geltz der vorgeda^vhten múnse vsser den vorgenanten ho^efen allerja^erlich ie ze sant Gallen tag geben vnd antwuten^e) a^vn allen fúrzug vnd widerred vnd a^vn allen ir schaden. Wa^er aber, dz die vorgenant fro Ann Blarrerin der vorgenanten vier pfund pfenning geltz von den vnd vsser den vorgenanten ho^efen von den buwlúten, so den die ho^ef bûwtin, dehaines jars vff den vorgeschribenn sant Gallen tag nút gantzlich vnd gar gewert wurd, so hat si friies vrlob vnd vollen gewalt, nach dem selben sant Gallen tag, wenn si wil, darvmb oder vmb so uil, so ir denn an dem vorgenanten lipding vss gestanden vnd nit gewert wa^er, ze pfendenn ze no^etenn ze geliher wis vnd o^vch in allem dem rehten, alz o^vch Intal Blarrer ir vatter dz selb ja^erlich gelt vntz her vff disen huttigen tag geno^vssen ingenomen vnd innegehebt ha^vt, a^vn alle geua^erd. Wenn o^vch die vorgenant fro Anna Blarrerin closterfrow in sant Katherinen closter erstirbet vnd enist von todes wegen, so sont danne die vorgenanten vier pfund pfenning geltes von den vorgenanten ho^efen dem obgenanten Intal Blarrer vnd sinen erben vnd na^vchkomen dannenhin gantzlich ledig sin vnd lo^vs vnd wider an sú genallen. Vnd ist diz beschehen vnd vollfu^ert redlich vnd reht nach vnsers gotzhus gewonhait vnd reht vnd alz es kraft vnd maht haben solt nû vnd o^vch hie nach. Vnd ze warem vrkúnd habent wir abt Cůn da obgenant vnser insigel gehenkt an disen brief. Ich der obgenant^f) Intal Blarrer, don^g) man nept^e) Blarrer Sta^ehelli, burger ze sant Gallen vergich offenlich, dz alles das war ist, so der hohwirdig fúrst Cůn von gottes gnaden abt des gotzhus ze sant Gallen min gna^ediger herr von mir an disem brief veriehen vnd verschriben hat^h), vnd ze noch merer sicherhait der selben dinge han ich o^vch min aigen insigel fúr mich vnd all min erben gehenk an disen brief. Geben ze sant Gallen an sant Barnabas tag, do man zalt von Cristi gebúrt drúzehundert jar vnd drú vnd ahtzig jar.

Source Fulltext: Chartularium Sangallense X, Nr. 5957, S. 128-129.