Allen den, die disen gegenwúrtigen brief ansehent alder ho^errent lesen, kúnde ich her Johans von Haidelberg || ritter vnd vergihe offenlich an disem brief, daz ich willeklich vnd mit gůter vorbetrahtunge nach miner || gůter frúnde vnd ander erber lúte rate dem beschaiden manne Stephan von Roggwille burger ze Costentz || vnd sinen erben vnd nachkomen hab ze koffent geben reht vnd redelich vnd eweklich min vogtye ze dem Oberen Sumbri, dú min lehen waz von dem bistůme ze Costentz vnd ja^ergelichs giltet ze zins vier phunt vnd zwelf schilling phenning Costentzer múns vnd sechs stuke an korn Costentzer messe vnd ie dú schůppůz¹ ain vasnaht hůn, vnd swaz zů der selben vogtye ho^ert, es sige mit wasen mit zwi mit waide mit holtz mit velde mit wisen mit a^ekkern mit wasser mit wasserlaiti mit wegen mit stegen mit abweg mit gerihten mit aller ehafti mit twingen mit ba^ennen mit gewaltsami mit aller gewonhait mit allen nútzen vnd mit allen rehten gesůchtz vnd vngesůchtz benemtz ald vnbenemtes, als dú selb vogtye an mich komen vnd braht ist vnd als ich si gehebt vnd genossen hab her vntz an disen húttigen tag, also hab ich dem selben Stephan von Roggwille vnd sinen erben vnd nachkomen die selben vogtye ze Obern Sumbri vnd daz vorgenant gelte, daz si ja^ergelichs giltet vnd swaz darzů ho^ert, ze koffent geben vmb hundert phunt phenning Costentzer múns, vnd bin och der gar vnd ga^entzlich von im gewert vnd sint in minen redelichen nutz komen vnd bekert, als ich vergihe an disem brief. Vnd hab im och die vorgenanten vogtye vnd den zins, den dú vogtye ja^ergelichs giltet, mit den rehten, so da vor geschriben stat, gefertigot vnd vfgeben an dez erwirdigen herren hant hern V^olrichs von gotz gnaden bischof ze Costentz², vnd hab mich darv´ber verzigen vnd verzihe mich an disem brief fúr mich vnd fúr alle min erben vnd nachkomen gen dem vorgenanten Stephan von Roggwille vnd gen allen sinen erben vnd nachkomen an der vorgenanten vogtye vnd an den zinsen, die dú selb vogtye giltet, vnd swaz darzů ho^ert, aller aigenschaft aller lehenschaft aller vorderung aller ansprach alles schirmes alles vszugs vnd aller hilf gaischlichs vnd weltlichs gerihtes, da mit ich ald kain min erben vnd nachkomen ald ieman andre von v´nseren wegen die vorgenanten vogtye ald die zins, die dú selb vogtye giltet, vnd swaz darzů ho^ert, kúndin ald mo^echtin angesprochen. Vnd wa^er, daz die selben vogtye ald den zins, den si giltet, ieman anspra^eche fúr aigen ald fúr lehen, dez so^elin ich vnd min erben vnd nachkomen in vnd sin erben vnd nachkomen verstan vnd versprechen vnd dez ir reht wem sin gen ma^enlichem nach reht ane geua^erde. Vnd ze warem vnd offenne vrkúnde vnd sta^eter sicherhait aller dirre vorgescribenen ding gib ich der vorgenant her Johans von Haidelberg fúr mich vnd fúr alle min erben vnd nachkomen dem selben Stephan von Roggwille vnd allen sinen erben vnd nachkomen darv´ber disen brief mit minem aigenen insigel besigelten. Der brief ist ze Costentz geben, do man von Cristes gebúrt zalt drúzehenhundert jar, darnach in dem sechs vnd vierzigosten jar, an sant Pancracien tag.

Source Fulltext: Chartularium Sangallense VI, Nr. 3981, S. 514-515.