Nos de Wartenberc¹ fratres Chv^onradus et Henricus notum fieri cupimus tam presentibus quam fu||turis, quod V^olricus miles de Swarzenbach² cognomine Hundesrukke tenebat in feodo a nobis || quoddam predium nostrum in Tieringeshart³ ipse solus et nullus secum nec aliquis preter eum, || cuius predii proprietatem dominium et potestatem et quicquid iuris in eodem habebamus contulimus ad petitionem V^olrici⁴ prepositi et Alberti dilecti nostri de Walpurc⁵ ecclesie Augensi⁴ nulla remunerati remuneratione nisi sola divina. Poteramus enim hoc ei libere conferre, quia libere nostrum fuit et ad nullum spectabat illud ius proprietatis nisi ad nos. Ne vero a memoria hominum recedat, ubi hec donatio facta sit, locum et testes et diem volumus nominatim exprimere in quadam feria sexta, quando episcopus habebat placitum in choro Constantiensi multis presentibus et precipue istis: Bertholdo monacho nepote nostro de Salem⁶ et fratribus suis Alberto et Henrico de Bussenanc⁷ militibus et Bertoldo de Burgelon⁸ et Henrico de Guttingen⁹ militibus. Ut autem hec omnia, sicut prelibata sunt, indubitanter credantur et de cetero firma et rata permaneant, sigillo domini nostri abbatis sancti Galli¹⁰, cui linea consanguinitatis in tantum attinemus, quod avunculi sui vocamur, presentem paginam communire fecimus. Dat. apud sanctum Gallum, III°. idus iulii.

Source Fulltext: Chartularium Sangallense III, Nr. 1176, S. 182-183.