In nomine domini amen. Scire debent universi tam praesentes quam posteri, quod nos Manegoldus decanus¹ totusque conventus monasteri sancti Galli deliberatione praehabita diligenti de communi omnium nostrum assensu et voluntate accedente nihilominus pleno et expresso consensu et permisso domini Bertholdi dei gratia abbatis² sancti Galli nostri statuimus, ut de omnibus praelaturis, officiis, beneficiis seu administrationibus quibuslibet monasterii nostri praebenda carnium, sicut instituta est vel adhuc instituetur, de festis duntaxat aut anniversariis contingens, sive nova dicantur servitia seu vetera, plenarie ministretur nec alicuius incidentis ieiunii, vigiliae aut sextae feriae occasione obmittatur aliquatenus vel mutetur, sicut hactenus fieri consuevit. Ad cuius utique statuti observantiam et ratihabitionem perpetuam nos, qui praesentes sumus, fide manuali prestita, nostrosque posteros obligamus et astringimus universos, cartam super hoc de mandato nostro confectam memorati domini abbatis et nostro sigillo facientes roborari ad maiorem evidentiam et cautelam, renunciantes omnibus actionibus, per quas praescriptum statutum nostrum posset a nobis vel ab aliis in posterum irritari vel aliquatenus impediri. Actum in capella beate virginis ante capitulum nostrum³ anno domini MCCLXII. in festo sancti Columbani, pontificatus domini Vrbani papae quarti anno II.

Source Fulltext: Chartularium Sangallense III, Nr. 1696, S. 504.