(C) + In nomine sanctae et individuae trinitatis. Heinricus Francorum et Longobardorum divina favente clementia rex. Omnium fidelium nostrorum tam praesentium quam et futurorum + pie devotioni pateat, quod venerabilis abbas monasterii sancti Galli Burchardus¹ nomine ad nos venit, nostris obtutibus praesentans praecepta beatae memoriae senioris et antecessoris nostri tercii videlicet Ottonis imperatoris augusti² || aliorumque regum et imperatorum, in quibus scriptum inveniebatur, qualiter ipsi praescriptum coenobium et res omnes illuc aspicientes sub regias et imperatorias emunitates suae tuitionis suscepissent. Pro rei tamen firmitate || petiit celsitudinem nostram, ut nos denuo id ipsum faceremus. Eius petitioni pie assensum praebentes simulque praedecessorum nostrorum constituta sub immunitate sancti loci perpendentes praecipimus et statuimus, ut praefatum monasterium ea immunitate subsistat, sicut cartarum textus eidem loco conscriptarum enuntiat, ut videlicet monachi in ipso monasterio convenientes secundum regulam sancti Benedicti abbatis^a) inter se eligendi licentiam habeant, praeposita tamen in omnibus regia electione³, et ut idem monasterium cum personis intrinsecus vel forinsecus sibi coherentibus, terris quoque cultis et incultis ad se iuste donative ac legaliter pertinentibus nostro nostrorumque successorum post deum et sanctos eius mancipatui subiectum nullius superioris aut inferioris persone˛ difficultate turbetur aut cuiuscumque praeceptionis sive districtionis molestiam patiatur. Sed liceat ipsi abbati sine ullius contradictionis obstaculo monachos suos regulariter regere, familiae praecipere, res monasterii ordinare, intus seu foris omnia iuxta consilii sui provisionem decenter congrue et utiliter gubernare. Negotia etiam cause˛que monasterii, quando necessitas occurrit, per coactum exigantur iuramentum, ipsius monasterii officialibus et advocatis in exigendis circumcirca eiusdem loci rebus ius sibi a nobis concessum habentibus. Igitur, ut praedictum est, sub nostrae tuitionis immunitate locus praenotatus subsistens ab omni aliene˛ inquisitionis seu exactionis molestia securus permaneat, ut dei servitoribus inibi degentibus pro nobis et regni nostri stabilitate sine aliqua forinseca inquietudine omnipotenti deo iugiter liceat supplicare. Et ut hoc nostrae concessionis praeceptum per futuri temporis curricula ratum perseveret, manu nostra illud assignantes firmavimus sigillique nostri inpressione insigniri iussimus.||
+ Signum domni Heinrici (M) invictissimi regis. +||
+ Egilbertus cancellarius⁴ vice Uuilligisi archicapellani⁵ recog. (S). +||
Data XV kl. iul. anno dominicae incarnationis MIIII, indict. I. anno vero domni Heinrici secundi regis III. Actum in Zurich, in dei nomine feliciter amen.

Source Fulltext: Chartularium Sangallense III, Nr. 871, S. 1-2.