In nomine domini amen. Ut pietatis opera locis et personis religiosis facta firmitate debita non frustrentur, dignum et pium || est, ea scripture munimine solidari. Igitur venerabiles in Christo dominus Albertus dei gratia abbas totusque conventus monasterii Au||gensis¹ ad Romanam ecclesiam nullo medio pertinentis recognoscentes provide ac salubriter deo placitum esse nee bonis aliquibus || displicere, si bona monasterii sui a laicis possessa, que vix aut numquam ad usum ipsius monasterii reditura sperantur, de manibus eorundem laicorum devolvi sinerent ad personas domino famulantes, indulserunt olim religiosis sororibus . . abbatisse et conventui monasterii de Maggenowe² Cisterciensis ordinis intuitu divine retributionis et, ut participationem bonorum omnium, que per eas fiunt, eo amplius consequerentur, quod possent de bonis predictis a laicis possessis adipisci per emptionem seu donationem usque ad decem mansus tantum et tenere in perpetuum sub annui census prestatione, sicut in instrumenta³ huiusmodi indulgentiam continente apparet evidenter. Adeptis itaque primitus bonis in Wuluikon⁴, que vendidit Guntrammus quondam miles de Spiegilberg⁵, deinde bonis in territorio ville de Stekboron⁶ emptis ab Hugone de Langinstein⁷, et item vineis in Ermv^oeting(en)⁸, quas vendidit V^olricus quondam de Salunstein⁹, itemque curia de Mettindorf¹⁰, quam dedit Conradus dictus Gielo de Glatteburg¹¹ miles, tandem cum Albertus miles de Hertin¹² dictus Hune crucesignatus volens transfretare in subsidium Terre Sancte vendidisset abbatisse et sororibus prenominatis curiam suam in Hertin cum Castro et attinentiis suis omnibus, et curiam in Mose¹³ cum decima, necnon et tria mancipia Conradum scilicet de Mose cum fundo, in quo residet, et Gerdrudim neptem eiusdem itemque Heinricum de Mose, supercreverunt redditus trium librarum et mancipia predicta ultra summam decem mansuum superius concessorum. Pro quibus utique redditibus et mancipiis cum preconcessis decem mansibus sub censu primitus imposito licite in perpetuum obtinendis prefatus Al. crucesignatus impetravit a domino abbate et conventu prescripti monasterii Augensis novam gratiam et licentiam specialem. Census autem, qui solvi debet monasterio Augensi de possessionibus prenotatis, est una libra cere domino abbati, una libra thuris et unum corporate custodi iamdicti monasterii in nativitate beate virginis annis singulis persolvenda. In quorum omnium evidentiam et robur firmitatis perpetue presens scriptum domini abbatis et conventus premissorum sigillis communitum monasterio de Maggenowe est in nomine domini assignatum. Dat. Augie anno domini MCCLXVIII. non. ianuar. pontificatus domini Clementis pape IIII^ti, anno III.

Source Fulltext: Chartularium Sangallense IV, Nr. 1793, S. 25-26.