Reverendis dominis et in Christo plurimum honorandis B. dei gratia abbati¹, R. preposito per Burgundiam² totique conventui monasterii sancti Galli Rodolfus || nobilis de Balma³ de pago Burgundie devotam et paratam semper ad omnia voluntatem. Dignum est, ut qui a deo multa recipiunt in rebus et || personis, ob que ad gratiarum tenentur merito actiones, in Signum recompensationis si non in totum, quod utique impossibile esset, saltem in partem aliquam^b) de suis in usus divinos || dedicent, per que apud deum per ipsius ministros in perpetuum sui memoria habeatur. Hinc est, quod cum ego divino compunctus amore aliqua pro remedio anime mee intenderem ordinare, inter cetera cogitavi quandam decimam me tenere sitam in villa Rorbach⁴, per quam commodius mee posset satisfieri voluntati. Intellexi etiam quandam capellam esse apud sanctum Gallum, que dicitur Sepulcrum Domini⁵, continuo tamen altaris ministerio carentem, ubi satis congrue meo proposito satisfacere cogitavi ea ratione, quod cum a monasterio eodem tenuerim decimam prelibatam, ad honorem eiusdem perpetuum fructus redigam decime memorate. Quare cum sicut vestra mihi scripsit benignitas, vos in eodem loco prebendam perpetuam statueritis dotando eam de redditibus monasterii vestri, per quam prebendam sacerdos perpetuo in suprascripta capella domino deserviens valeat sustentari, sepescriptam decimam dimidia pro parte in manus prepositi per Burgundiam mei domini feodalis libere resigno per presentes cedens ad manus eiusdem omni iuri feodali^c) successivo vel etiam censuali, immo generaliter et specialiter omni iuri, quod ego vel heredes mei seu etiam successores, quicumque aliquid iuris vel facti nobis in eadem decima vendicare possemus, sub hac forma, ut quicumque pro tempore de gremio monasterii sancti Galli preposituram per Burgundiam administrandam acceperit, IIII^or. lib(ras) Constantiensis monete capellano in predicta capella domino servienti de prefata decima, ut dictum est, dimidia persolvat annuatim infra octavam beati Galli^d), ut per hoc idem capellanus apud deum memoriam mei agens veniam mihi precetur salutarem. Reliqua vero pars eiusdem decime, quam mihi quoad vitam meam retineo, post obitum meum cedet ex integro monasterio sancti Galli. Preterea cum IIII^or. scopozas, quarum tres site sunt in villa Rorbach, quarta in loco, qui dicitur in dem Wile⁶, a vobis et vestro monasterio pro annuo censu duorum solidorum iure teneam feodali, ipsum censum de predictis scopozis cum duobus augmentavi solidis, hec cum prefata decima tali conditione faciens, ut predicta capella nulli persone de vestro conventu officianda aliquatenus conferatur, sed honesto alicui sacerdoti, qui ibidem personaliter et continue deo serviat nec sibi audeat aliquem vicarium subrogare, qui etiam singulis septimanis pro mea et uxoris mee dicte Judenta⁷ ceterorumque mihi attinentium salute feria secunda pro defunetis et feria quinta pro vivis teneatur in perpetuum celebrare, et hec aliis etiam diebus fiant, cum predictis diebus non possunt fieri competenter. Hanc etiam adicio conditionem salva reverencia vestra, ut si quocumque titulo venditionis, obligationis, permutationis, emphitheosis vel etiam cuiuslibet alterius per abbatem una cum capitulo vel etiam sine consensu eiusdem predictam medietatem decime vel integram post obitum meum alienari vel distrahi contingeret, ad heredes meos seu successores legittimos omne ius revertatur, quod ego ad presens in dicta decima habere dinoscor. Ceterum volo, ut predicta capella, cum ipsam vacare contigerit, infra decem ebdomadas, nisi certa hoc impedierit necessitas, conferatur, et has conditiones inseri peto instrumento⁸ conficiendo super prebenda constituta vel constituenda capellano eidem capelle in dei nomine servienti. Demum cum cautela bona sit et superhabundans non noceat, salva pace vestra ordinando constituo, ut si contra prdictos^e) articulos et piam ordinationem ausu temerario quis venerit vel observare contempserit, predicta decima ad me et ad meos successores legittimos sine contradictione qualibet revertatur. Ut autem hec firma maneant et in perpetuum inconcussa, presens instrumentum meo sigillo communivi in testimonium premissorum. Datum et actum in Castro Alpurren⁹, anno domini M°.CC°.LXIX. mense ianuarii. Et ut premissa maiori robore fulciantur, ego V^olricus nobilis de Balma¹⁰ frater carnalis predicti R. nobilis de Balma grato occurrens assensu duxi proprium apponendum sigillum in testimonium predictorum.

Source Fulltext: Chartularium Sangallense IV, Nr. 1820, S. 39-40.