Albertus dei gratia abbas¹, Marquardus decanus², Burkardus prepositus³ totusque conventus monasterii Augensis ad Romanam ecclesiam nullo medio pertinen||tis venerabilibus et in Christo dilectis Adilheidi abbatisse et conventui monasterii de Maggenowe⁴ Cistertiensis ordinis salutem et per boni operis fructum divillne contemplationis gratiam promereri. Recognoscimus indulsisse nos olim vobis et monasterio vestro intuitu retributionis divine et ut participes || efficeremur bonorum omnium, que per vos fiunt, quod videlicet adipisci possitis de possessionibus ad ius et proprietatem nostri monasterii pertinentibus usque ad estimationem decem mansuum tenendorum sub prestatione annui census, prout apparet in instrumento⁵ vobis tradito huiusmodi indulgentiam continente. Verum quia deo auctore adeo ampliatus est postmodum numerus congregationis vestre, ut opus habeatis pro sustentatione vestra debere ampliari etiam bona vestra, nos propter eum, qui dat escam omni carni et sperantes in se non derelinquit, vestre indigentie subvenire volentes ad multam et devotam instantiam vestram item de novo indulgemus vobis et monasterio vestro tenore presentium, ut possitis alios decem mansus ad monasterium nostrum pertinentes de bonis predialibus seu feudalibus vassallorum et ministerialium tantum dicti monasterii nostri emere seu per donationem recipere et licite ad usus vestros tenere in perpetuum sub annuo censu duarum librarum cere in festo nativitatis beate virginis monasterio nostro^a) annis singulis persolvendo. Cuius census medietatem tunc demum persolvere teneamini, cum mediam partem indultorum vobis mansuum adepte fueritis, reliquam tandem medietatem, cum ipsos mansus pleniter consecute fueritis soluture. Hoc adiecto expresse, ut cum bona premissa conferenda fuerint vobis et monasterio vestro facta resignatione eorundem ad manus abbatis a possidentibus, ipse abbas ea vobis et monasterio vestro sine qualibet difficultate conferat et assignet, ut ex utilitate huiusmodi gratie nostre domino volente proficientes divino servitio commodius et liberius intendere valeatis et pro nostris, quos incessanter contrahimus, excessibus teneamini divine maiestatis clementiam propensius implorare. Renuntiantes ex nunc voluntarie et expresse pro nobis et successoribus nostris omnibus exceptionibus et actionibus, per quas gratie vobis ut premissum est facte Processus posset modo quolibet calumpniari irritari seu aliquatenus impediri. In quorum omnium evidentiam et robur firmitatis perpetue presentem cartam vobis tradimus sigillorum nostrorum abbatis scilicet et conventus appensione munitam. Dat. Augie anno domini MCCLXVIIII. non. april. indict. XII. Romana sede vacante⁶.

Source Fulltext: Chartularium Sangallense IV, Nr. 1826, S. 45.