In nomine patris et filii et spiritus sancti amen. Universis Christi fidelibus presentes litteras inspecturis ego Arnoldus decanus et plebanus ecclesie in Raprehtswile¹ Constanciensis || diocesis noticiam subscriptorum. Que pia intentione hominum ordinantur, debent favore et auxilio prosequi singulorum. Noverint igitur universi presentem litteram inspecturi, quod ego de || consilio discretorum virorum de rebus meis ordino in hunc modum. Quia igitur . . abbas et conventus ordinis Cisterciensis in Capella² tenentur michi in XVI marcis argenti, volo, || ut dictam peccuniam restituant de consilio executorum meorum post obitum meum secundum meam ordinationem distribuendam, videlicet conventui fratrum Predicatorum in Thurego³ decem marcas, apud quos michi locum eligo sepulture, item conventui sororum ordinis Cisterciensis in Vro^vwental⁴ XXV solidos, conventui sororum in Agrei⁵ XXV solidos, item sorori Hemme unam marcam. Residuas quatuor marcas duxi pro remedio anime mee predicto conventui relaxandas et volo, ut ipsi anniversarium meum agere teneantur. Item volo, quod abbas et conventus ordinis Premonstratensis in Ruti⁶ de bonis, in quibus michi tenentur, solvant ad dictum executorum meorum decem marcas et dimidiam, videlicet conventui fratrum Minorum in Thurego⁷ unam marcam, capitulo ecclesie maioris Constantiensis XXV solidos, capitulo prepositure Thuricensis⁸ unam marcam et canonicis ecclesie ultra aquam ad abbaciam⁹ XXV solidos, et rogo, ut dicti canonici utriusque ecclesie dei intuitu cum processione ad ecclesiam fratrum Predicatorum in die sepulture mee veniant ad meas exequias celebrandas, item conventui sororum in O^etenbach¹⁰ duas marcas, item conventui sororum de Constantia in Thurego¹¹ unam marcam, item conventui sororum de Wurmsbach¹² unam marcam, item conventui sororum in Wida¹³ XXV solidos, item domino Nicolao in Bv^obinkon¹⁴ unam marcam, cui etiam lego psalterium meum, quod habet abbas in Ruti, item preposito et capitulo in Monte Thuricino¹⁵ duas marcas. Residuum debitorum meorum, videlicet viginti marcas argenti et triginta urnas vini predicto conventui de Ruti relaxo et volo, ut ipsi anniversarium meum agere teneantur. Si autem, quod absit, difficiles essent ad solvendum ea, que in precedentibus ordinavi, volo, ut executores mei omnia, que eis relaxavi, secundum voluntatem suam in pios usus distribuant, eis de debitis, in quibus michi tenentur, nichil relinquentes. Item commendatori et conventui in Bv^obinkon¹⁶ quinque marcas, pro quibus michi domum in sua area edificare debuerant nec fecerunt, pro remedio anime mee duxi relaxandas. Item conventui ordinis Cisterciensis in Wettingen¹⁷ lego tres marcas, ut anniversarium meum agant. Item conventui sororum ordinis Cisterciensis de Ponte Leonis¹⁸ lego domum meam, de qua ad fabricam maioris ecclesie Treuerensis¹⁹ tres solidos Treuerenses singulis annis solvant. Item lego eisdem vineas meas et relaxo debita mea, in quibus michi tenentur, ut perpetuo anniversarium meum agant, et volo, ut conventui fratrum Predicatorum in Treueri²⁰ unam marcam solvere teneantur. Ad hec omnia, que post obitum meum apud me inventa fuerint, sive sint mobilia sive immobilia, in auro, argento sive in vestibus sive in suppellectili, et omnia, que tunc habere potero, committo fratri Willelmo ordinis Predicatorum confessori meo ordinanda et distribuenda ad pia loca cum consilio Lvtoldi et Heinrici fratrum dictorum Vuschi civium Thuricensium, prout anime mee secundum consciencias suas viderint expedire, nisi contingeret me super hiis in posterum aliud ordinare. Ne autem super predictis dubium aliquod oriatur in posterum, presentem ordinationem sigillo prioris fratrum Predicatorum in Thurego et sigillo meo proprio duxi roborandam. Acta sunt hec apud Thuregum, anno incarnationis domini millesimo ducentesimo septuagesimo octavo.

Source Fulltext: Chartularium Sangallense IV, Nr. 2024, S. 187-189.