Wir von gottis gnaden abbet Rv^omo von sante Gallen¹ kvnden allen dien, die disen brief sehint || alder horrent lesen, dc wir haben gesezzit mit allem rehcte dvrhc vnsirs gottishusis nvzs || vnde notdurfte den hofh ze Dielsdorfh² ze einem rehctem phande ane den chilchvn saz, den || nemen wir vz, vmbe fvnf vnde zweinzic marc Lutolt dem frien herren hern V^olrihcs sailigens svn von Reginsperhc³ zv^o drizic marchen, die er êe dar vf hatte, alse vnser brief hant, die wir ime gegebin haben. Vnde veriehen, dc wir den selben vorgenanten hof niemer son verko^vfen noh versezzin, wir haben in danne vns vnde vnsirme gottishvse ee irloset an alle geverde. Dis haben wir ime zv^o vns ze tro^ester gegebin vnsirn brv^odirn, vnsirn herren abbet Albrehcten von O^vwe⁴, dc es stete belibe. Dis sint die gezvge, die ze gegenwurte waren: grave Friderihc von Toggenburhc⁵, Heinrihc von Bunishouen der korherre ze Bischofhcelle⁶, her Egelolf von Rorschahc⁷, her Walther von Bunishouen⁸, Ar. von Steinimure⁹, Heinrihc von Ebenode¹⁰ vnde ander ersame livte. Dc dis war si vnde stete belibe, so henken wir abbet Albrehct von gottis gnaden ze O^vwe vnde wir abbet Rv^omo von gottis gnaden ze sante Gallen vnde ihc her Eberhart von Bichilnse¹¹ der druhsazze vnseru insigil an disen gegenwurtigen brief ze einem warin vrkvnde. Diz geschach nah vnsirs herren geburte Iesu Christi tusint jar, zwei hvndirt jar, ahczic jar vnde dar nah in dem^a) ersten jar ze Yberch¹² in dem bo^vingarten an dem nahstem svnnentage vor sante Verenun tvlt.

Source Fulltext: Chartularium Sangallense IV, Nr. 2061, S. 222-223.