Universis presentium inspectoribus Chůnradus dei gratia abbas monasterii sancti Galli¹ ordinis sancti Benedicti Constantiensis dyocesis, Elisabeth eadem gratia abbatissa et || . . conventus monasterii Thuricensis² eiusdem ordinis et dyocesis affectum karitatis. Noverint quos nosse fuerit oportunum, quod cum Chůnr. dictus Lindower civis || Thuricensis³ nobis videlicet abbati et conventui monasterii nostri iure servitutis pertineret et idem nobis minus utilis et fructuosus existeret, eo quod a nobis remotus Thure||gi inter homines et bona monasterii Thuricensis iam circiter triginta annos resederit et adhuc resideat ab honere servitiorum erga nos immunis, et cum Chůnr. dictus Traber de Gundolzhusen⁴ nobis videlicet abbatisse et conventui monasterii Thuricensis iure servitutis pertineret et idem similiter nobis minus utilis foret, eo quod et ipse a nobis remotus apud Gundolzhusen inter homines et bona monasterii sancti Galli iam diu resederit et adhuc resideat similiter ab honere serviciorum erga nos immunis, nos abbas predictus tractatu non semel sed pluries cum conventu nostro super permutatione predicti Chůnr. Lindowers pro prefato Chůnr. Traber facienda prehabito, non dubitantes id monasterio nostro fore profuturum, auctoritate et mandato ab ipso nostro conventu super ipsa permutatione perficienda acceptis, nos etiam abbatissa et conventus monasterii Thuricensis similiter tractatu pluries inter nos super huiusmodi contractu celebrando prehabito, non dubitantes id nobis fore profuturum, in nomine domini permutationem predictarum hinc inde inter nos fecimus personarum, ita ut predictus C. Traber cum filiis, quos iam habet vel in posterum habuerit, monasterio sancti Galli iure servitutis secundum morem et consuetudinem ipsius monasterii hactenus observatam sit obligatus⁵, et predictus Chůnr. Lindower cum filiis, quos iam habet vel in posterum habuerit, monasterio Thuricensi iure servitutis similiter secundum morem et consuetudinem ville Thur(icensis) hactenus observatam sit obligatus. Promisimus etiam hinc inde inter nos et presentibus promittimus pro nobis nostrisque successoribus, quod premissum contractum numquam impugnabimus per nos vel per alios verbo vel facto, sed quod ipsum ratum habebimus, renunciantes mutuo inter nos^a) restitutionis in integrum, doli mali et in factum actionibus et exceptionibus et generaliter omni actioni, exceptioni, defensioni, iuri, consuetudini, privilegio, constitutioni et auxilio legum et canonum, per que huiusmodi contractus aliqualiter posset immutari, et specialiter legi, que dicit generalem renuntiationem non valere. Acta sunt hec Thuregi in monasterio nostro videlicet abbatisse et conventus predictorum, anno domini millesimo ducentesimo nonogesimo^b), quarto non. ianuarii, indict. tercia, presentibus domino V^olrico de Jegisdorf⁶, domino . . de Tufen⁷ seniore monachis monasterii loci Heremitarum⁸, domino V^olrico Giel de Glatteburg⁹, domino Eberardo de Eilggo^ewe¹⁰, domino Ru^edegero Manessen seniore militibus, domino Růdolfo clerico de Rorschach¹¹, domino Richwino vicario ecclesie in Obernchilch¹², Burkardo dicto Ômo¹³, Berchtoldo dicto Bruner cive Thuricensi et aliis pluribus fidedignis. Et in testimonium et evidentiam premissorum nos Chůnr. abbas antedictus sigillum nostrum pro nobis et conventu nostro et nos Elisabeth abbatissa et conventus monasterii Thuricensis sigillum nostrum videlicet abbatisse, quo et nos conventus utimur, cum proprium non habeamus, huic carte seu instrumento apponi fecimus et appendi, anno, loco, die et indictione prenotatis.

Source Fulltext: Chartularium Sangallense IV, Nr. 2226, S. 346-347.