Wir vrow Elizabete grefenne von Honberg vnd^a) frowe von Raprechtswile¹ kvnden allen, die disen || brief sehent ald horent lesen, das wir von hern Diethelns bette von Windegge² mit vnsers vogtes || hant hern Rv^odolfes von Wedeswile³, den wir vber dise sache ze vogete genomen han, vnd o^vch mit || vnsers svnes willen Wernhers⁴, der da zegen^b) was, die vogeteie ze Vnderbach⁵, die er von vns ze lene hate vnd vns vf geben het, die selben vogeteîe mit allem rechte, als sv vns von vnsren vordren der herschaft von Raprechtswile von eîgenschaft an komen ist⁶, . . dem abt vnd sim goteshvs von Rvti⁷ geben hein vnd geben an disem briefe mit wasen mit zwîe mit holtz mit^c) velde vnd mit alre ehafte in eîgenlich gewer ewichlich ze besitzen ane alle wider rede, vnd geloben in fur vns vnd fvr vnser erben, das dise gabe stete si ane allen krîech vnd wir sv dar an nîemer bechvmberren an deheim gerichte weltlichem ald geslichem. Vnd das dis stete belibe, so geben wir in disen brief offenlich besigilt mit vnserm ingisigel vnd mit vnsers vogetes ingisigil des vor genanden heren von Wedeswile. Dis beschach ze Raprechtswile⁸ vf der bvrch, da ze gegen waren mâister V^olrich der kilichere von Walde⁹, her Rv^edeger von Werdegge¹⁰, her Albrecht von Vrinchon¹¹, her Heinr. von Thvnrethon¹², Dietheln vnd Chv^entzelman sin brv^oder von Vrinkon¹³, Jacob der schvlthetze von Raprechtswile¹⁴, Heinr. der amman von Grino^vwe¹⁵, V^olrich der Heiden vnd ander erberre lvte, do nach gotes geburte waren zwelfhvndert vnd nvnzig jar, do beschach es in dem vierden jare an dem nvnden tage herbestes.

Source Fulltext: Chartularium Sangallense IV, Nr. 2355, S. 441-442.