Universis et singulis, ad quos presentes littere pervenerint, Heinr. villicus de Dunrten¹ miles salutem cum subscripte rei noticia. Ne acta hominum perversorum maliciis per oblivionem vel falsis machinacionibus pro tractu temporis calumpniari valeant, tantum^a) est, ea ad perpetuam firmitatem scripture testimonio perhennari. Noverint igitur tam presentes quam posteri, quod ego H. villicus de Dunrten miles honorabilibus dominis abbati et conventui in Ruti² ordinis Premonstratensis Const(antiensis) diocesis mansum meum situm in Oberdunroten³ solventem singulis annis quinque maltra avene, duos modios tritici, XVI sol. den. et quod vulgariter dicitur zwen kloben werch, centum ova et tres pullos, quem colit C. dictus Reinger, qui vulgariter dicitur des Luczers hůb, titulo proprietatis, quam videlicet proprietatem procuravi prenominatis dominis abbati et conventui a domino comite R. de Habspurg et comitissa de Rappreswil⁴ tradi et resignari in manus abbatis et conventus ad peticionem meam iure proprietatis perpetuo possidendum, quas possessiones usque ad hec tempora tenui in feodum ab ipsis sive a domino Rappreswil, vendo et vendidi, trado et tradidi cum omnibus attinenciis suis et cum omni alio iure, quo ego predictum mansum possedi liberum et absolutum ab omni onere, ipsis et successoribus suis iure proprietatis perpetuo possidendum pro precio videlicet quinquaginta librarum monete Thuricensis, quam utique peccuniam me recepisse ac mihi fore numeratam et traditam a predictis emptoribus et in evidentem meam et successorum meorum utilitatem conversam confiteor per presentes, obligans me et successores meos heredesque meos bona fide sub yppotheca omnium rerum mearum ad prestacionem warandie in omni iudicio et extra et contra quamlibet personam ecclesiasticam vel secularem, et interesse et expensas, quas ipsi fecerint huiusmodi occasione, plenarie resarcire, promittens pro me meisque heredibus, ipsis emptoribus pro se suisque successoribus stipulantibus, super predicto manso in iudicio vel extra litem vel conversiam^b) non movere, sed ab omnibus impugnantibus ipsas possessiones meis expensis libere defendere et tueri. Preterea in remedium animarum mei videlicet et parentum meorum Růd. servum meum conservum^c) dictum Luzer cum omnibus suis rebus et persona mihi attinentem ratione proprietatis ob honorem beate Marie virginis in manus abbatis ratione monasterii cum predictis possessionibus libere resignavi, renuncians pro me et heredibus meis omni accioni excepcioni decepcioni et omni iuris auxilio canonis^d) vel civilis, si quid forte michi et heredibus meis posset competere in iudicio ecclesiastico vel civili vel placito seculari, per quod predicta vendicio ac salutifera donacio posset aliquo tempore revocari. In huius rei evidenciam hoc presens instrumentum reverendis dominis et emptoribus in perpetuam firmitatem, etiam ut hec rata et firma aput me meosque successores permaneant, sigilli mei trado munimine communitum. Datum et actum in Rappreschwil testibus subnotatis presentibus Ru^edgero de Werdegg⁵, Hugo^e) de Landenberg⁶ militibus, domino R. de Kempten⁷ ordinis Premonstratensis, H. de Galginen⁸ et C. dicto Sto^elczli de Dunrten anno domini M°CC°LXXXXVI°, III° idus aprilis, indic(ti)on(e) nona.

Source Fulltext: Chartularium Sangallense IV, Nr. 2400, S. 471-472.