Allen^a) den, die disen brief ansehent lesent oder ho^erent lesen, kúnd ich Johans, Růdolfs sa^elgen von O^vwenhofen¹ êlicher sun, || vnd vergich dez offenlich mit disem brieue fúr mich vnd alle min erben, daz ich lieplich vnd gu^etlich v´berain komen vnd ver||riht bin gantzlich vnd gar mit den ersamen vnd wolbeschaidnen Bartholome Blarrer, Johansen Blârrer Gerwigs sun || vnd mit Johansen am Bolle phleger der siechen dez spittals ze sant Gallen² an dez selben spittals stat vnd mit Růdolfen, Hainrichs sa^elgen sun von O^vwenhofen, minem o^ehain iro hindersa^etzzen vmb alle die sto^esse misshellung vnd ansprâchen, die ich mit in ald zv^o in gehept han vntz her vff disen húttigen tag, alz dirre brief geben ist, von dez hofes wegen ze O^vwenhofen vnd waz darzv^o geho^ert, der dez vorgedahten spittals ze sant Gallen ist vnd den der obgenant Růdolf, Hainrichs sa^elgen sun von O^vwenhofen, min o^ehain von in buwet, vnd darumb so han ich vorbenemter Johans, Růdolfs sa^elgen sun von O^vwenhofen, willeklich gelobt mit miner trúwe vnd loben mit disem brieue an aines rehten aides stat fúr mich vnd alle min erben, daz ich noch min erben, ob ich enbin, noch nieman andre an v´nser stat noch von v´nsern wegen die vorgedâhten phleger noch dehain iro nachkomen noch den vorgeschribenen spittal ze sant Gallen noch dehain iro buwlút noch hindersa^etzzen noch den vorgenemten Růdolf, Hainrichs sa^elgen sun von O^vwenhofen, minen o^ehain noch sin erben, ob er enwa^er, von dez vorgeschribenen hofes wegen ze O^vwenhofen niemer mêr súllent noch wellent ansprechen v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân geriht noch mit enkainer lay ander sache, ân alle geua^erde. Vnd han darumb von in willeklich genomen vnd enphangen fúnf phunt phenning gůter vnd gena^emer Costentzzer múnse, die an minen offenen nutz komen sint vnd bewendet. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich erbetten diz nâchgenemten from vest ritter min gna^edigen herren hern Eglolf von Wolffurt³ vnd hern V^olrich von A^emptz⁴ vogt ze Arbon⁵, daz sú irú insigel fúr mich vnd alle min erben gehenkt hant an disen brief, won ich aigens insigels niht han. Wir die vorgenemten Eglolf von Wolffurt vnd V^olrich von A^emptz baid ritter veriehent offenlich mit disem brieue, daz wir von ernstlicher bet wegen dez vorgenanten Johansen, Růdolfs sa^elgen sun von O^vwenhofen, won er aigens insigels niht hât, v´nserú insigel fúr in vnd alle sin erben gehenkt habent an disen brief v´ns vnd allen v´nseren erben gantzlich vnscha^edlich. Diz beschach vnd ward dirre brief geben ze Arbon an dem na^ehsten zinstag vor v´nsers hêrren frôn lichamen tag in dem jâr, do von Cristus gebúrt wârent drúzehenhundert jâr, sibenzig jâr vnd darnach in dem dritten jâre.

Source Fulltext: Chartularium Sangallense IX, Nr. 5363, S. 39-40.