Dem edeln hocherbornen minem genedigen herren graf Ruodolf von Hapspurg¹ entbu^et ich Albrecht Vogt von Utzna² minen willigen dienst bereit ze allen u^ewern sachen. Genediger herr, ich tuon u^ewer erwirdekeit ze wißen, das ich von u^ech ze lehen han gehebt drittehalb iuchart reben sint gelegen uf Rekolterbu^eel³ bi Golpach⁴ an dem Zürichse⁵ und hus und hofstat mit aller zuogeho^ert, dieselben reben und das lehen mit aller zuogeho^ert ich üch send und ufgib mit disem gegenwrtigen brief für mich und alle min erben und nachkomen mit der bescheidenheit, das ich üwer erwirdekeit bitte flißeklich und ernstlich, das ir dieselben reben hus und hofstatt mit aller zuogehord lihent und geben dem erbern geistlichen herren bruoder Wernher Schürer comendur des hus ze Buobikon sant Iohans ordens⁶ und demselben hus und den bruodern desselben huses und allen iren nachkomen mit solicher ehafti und sicherheit, das si und alle ir nachkomen daran habent siient, wan ich ihnen och dieselben reben hus und hofstat mit aller zuogeho^ert geben han und och gib mit disem brief luterlich dur got und umb ein libding, das si mir und miner elichen wirtinnen darumb geben sont, als der brief⁷ wol wiset, den si mir darumb geben hant, und verzieh mich och für mich und alle min erben und och nachkomen alles rechten vordrung und ansprach, so ich oder dekein min erb oder nachkom zuo den selben reben hus und hofstat und zuo aller zuogeho^erd, als ich si untzhar gehebt han, iemer mer gewinnen mo^echt mit keinen sachen, und lob och für mich und alle min erben, das war und stete ze han und darwider niemer ze tuon nach schaffen getan mit keinen sachen, damit der vorgenant comendur und das vorgeschriben hus und alle ir nachkomen ze Buobikon an denselben reben hus und hofstat mit aller zuogeho^erd iemermer nu oder harnach bekrenket gesumet oder geirret werden in dekein weg, an alle geverde. Und des und aller dir vorgeschriben dingen ze einem waren urkund so gib ich der vorgenant Albrecht Vogt disen brief besigelt mit minem eigen ingesigel. Dis beschach und wart och diser brief geben, do man zalt von gottes geburt dru^ezehenhundert und sibenzig iar, darnach in dem dritten iare, uf den meyen tag.

Source Fulltext: Chartularium Sangallense IX, Nr. 5351, S. 20.