Wir Geori von gottes gnâden abt des gotzhus ze sant Gallen¹, das ân alles mittel dem stůl ze Ro^vm zůgeho^ert, veriehen vnd tu^en kund mit disem || brief allen, die in ansehent lesent oder ho^erent lesen, dz fúr v´ns kamen ze Wil² in v´nserm hof, do wir offenlich ze geriht sassen, der from vest || ritter v´nser vnd v´nsers gotzhus lieber getruwer dienstman herr Fridrich von Húnwille vnd Herdegan³ sin êlicher sun, vnd offenoten da mit || fúrsprechen vnd sprachen, daz sú mit gůter vorbetrahtung vnd beschaidenhait von ir redlichen not wegen redlich vnd reht verkoffet hettin die zwen ho^ef, die man nemmet Bo^vssikon⁴, gelegen bi Húnwille mit gerihten mit twingen mit ba^ennen mit hus mit hof mit holtz mit veld mit akker mit wisen mit wunn mit waid mit wegen mit stegen mit wasen mit zwî mit wasser||
mit wasserflússen mit wasserlaitung mit allen rehten nútzen vnd gewonhaiten vnd mit aller zůgeho^ert, die von v´ns vnd v´nserm gotzhus ir reht zinslehen wa^erin, also dz man ia^erlich an v´nser custerye v´nsers vorgeschriben gotzhus von den selben ho^efen zwai pfund wahs ze zins geben sol, vnd hettin ze ko^vffenn geben dem erbern in gott brůder Wernher comentúr des huses ze Bůbikon⁵ sant Johans ordens des hailigen spitals ze Jherusalem sinen nachkomen vnd dem selben gotzhus ze Bůbikon vmb sehs hundert guldin vnd vmb ain vnd drissig guldig^a) gůter an dem gold vnd swa^er an der gewiht, der sú gantzlich vnd gar von inen wa^erin gewert an den stetten, da sú iren fromen mit geschaffet hettin, vnd wo^eltint o^vch dem selben brůder Wernher sinen nachkomen vnd dem selben gotzhus ze Bůbikon die vorgeschriben ho^ef mit allen rehten vfgeben vnd vertgon, vnd baten v´ns erfarn an ainer vrtail, wie sú das tůn so^eltin, daz es kraft hetti nu vnd hienach, do fragten wir vrtail vmb vnd ward ertailt mit gemainer vrtail, dz der vorgenemt herr Fridrich von Húnwille vnd Herdegan sin sun die selben ho^ef vfgeben so^eltin an v´nser hand zů des vorgenemten brůder Wernhers siner nachkomen vnd des selben gotzhus handen vnd dz es also wol kraft hetti nach dem rehten. Das taten o^vch sú vnd gaben do ze stett die vorgenemten herr Fridrich von Húnwille vnd Herdegan sin sun die vorgeschriben ho^ef ze Bo^vssikon mit allen rehten ledklich vf an v´nser hand zů des vorgeschriben gotzhus handen ze Bůbikon, als reht sitte vnd gewonlich was vnd als mit rehter gemainer vrtail ertailt ward, vnd santen o^vch wir do ze stett die vorgeschriben ho^ef mit allen rehten nútzen vnd gewonhaiten vnd mit aller zůgeho^ert dem vorgenemten brůder Wernhern vnd dem selben gotzhus ze Bůbikon bi dem erbern brůder V^olrich dem Wisman Schaffner des vorgeschribnen gotzhus zů des vorgeschriben gotzhus handen in rehtes erbzinslehens wis von v´nserm vorgeschriben gotzhus, also dz sú der selb brůder Wernher sin nachkomen vnd das vorgeschriben gotzhus ia^erlich von den selben ho^efen ze zins geben vnd rihten sont an v´nser vorgeschribnen custerye ze sant Gallen zwai pfund wahs, vnd entzigent sich o^vch da ze stett die vorgenemten herr Fridrich von Húnwille vnd Herdegan sin sun fúr sich vnd fúr alle ir erben vnd nachkomen gen^b) dem vorgenemten brůder Wernher sinen nachkomen vnd gen dem selben gotzhus ze Bůbikon vnd entzihent sich mit disem brief aller aigenschaft aller lehenschaft aller kuntschaft aller gewer aller zúgnust lút vnd brief alles rehten gaistliches vnd weltliches gerihtes aller vordrung vnd ansprach, so sú von reht von gewonhait oder von dehainen andren sachen zů den vorgeschriben ho^efen ald daran hatten oder hernach iemer gehan gewinnen oder erwerben mo^ehtin, die vorgenemten herr Fridrich von Húnwille vnd Herdegan sin sunt^a) hant o^vch gelopt fúr sich vnd fúr alle ir erben, der vorgeschriben ho^ef vnd des ko^vffs reht wer ze sinn nach dem rehten gen ma^englichem vff gaistlichem vnd vff weltlichem geriht, wa wenn ald wie dik der vorgenemt brůder Wernher comentúr sin nachkomen oder das vorgeschriben gotzhus bedurfent vnd notdurftig sint ald darumb vfgetriben vnd angesprochen werdent, daz sú sú darumb ân allen iren schaden verstan vnd versprechen sont vnd von der ansprach entrihen vnd ledig machen ân geua^erd. Vnd des ze vrkúnd vnd sta^eter sicherhait haben wir abt Geori dauor genemt v´nser insigel gehenkt an disen brief. Darnach veriehen wir die vorgenemten Fridrich von Húnwille ritter vnd Herdegan sin sun ain gantz warhait aller diser vorgeschriben ding vnd das alles das war ist, daz der erwirdig v´nser gna^ediger herr abt Geori dauorgenemt von v´ns veriehen hat an disem brief, vnd des ze merer sicherhait haben wir o^vch v´nsri insigel gehenket an disen brief. Der geben ist ze Wil an dem na^ehsten donrstag nach sant Gordianus tag in dem jar, do man zalt von gottes gebúrt drúzehenhundert jar vnd darnach in dem drú vnd sibentzigosten jar.

Source Fulltext: Chartularium Sangallense IX, Nr. 5353, S. 22-23.