In nomine domini amen. Per hoc presens publicum instrumentum cunctis ipsum intuentibus pateat evidenter, quod sub anno a nativitate eiusdem millesimo tricentesimo septuagesimo tercio pontificatus sanctissimi in Christo patris ac domini nostri domini Gregorii digna dei providencia pape XI^mi anno tercio indictione undecima sextadecima die mensis maii hora sexta vel quasi in Castro situato in oppido Vcznach¹ Constan(ciensis) dyocesis in mei notarii publici et testium subscriptorum presencia personaliter constituti sublimis ac magnificus dominus dominus Donatus comes de Toggenburg² ex una et honorabilis et religiosus vir frater Chabertus de Montelisio canonicus monasterii sancti Anthonii Viennensis dyocesis preceptor domorum et baliviarum peticionis sancti Anthonii dicte Constan(ciensis) dyocesis³ parte ex altera prefatusque dominus Donatus comes pro se suoque Diethelmo sui fratris⁴ nomine habens eciam ut asseruit plenam potestatem ad subscripta promisitque in manus mei notarii publici subscripti omnia et singula subscripta pro se suoque fratre predicto ac omnibus et singulis suis successoribus et heredibus universis subscriptam donacionem ratam et gratam inviolabiliter perpetuo tenere et habere, de qua eciam donacione corporale prestitit iuramentum, donavit enim ad honorem omnipotentis dei et beate ac gloriose virginis Marie, sancti Anthonii, sancti Michahelis omniumque sanctorum et ob augmentum divini cultus necnon ob suorum parentum ac benefactorum suorum remedium animarum suarum bona subscripta, habens eciam de hiis consilia suorum consiliariorum, quomodo et per quem modum subscripta piis locis elargiri possunt, qui eciam iuxta consilia prudentum ac consiliariorum suorum suo ac sui fratris nomine consuluerant, ut ipse bona et possessiones subscriptas dare tradere et assignare deberet ob honorem sancti Anthonii et ut in oppido Vcznach predicto claustrum seu cenobium eiusdem ordinis sancti Anthonii construeretur et edificaretur, propter que consilia dictus dominus Donatus comes de voluntate ut asseruit sui fratris domini Diethelmi predicti bona subscripta donavit tradidit et assignavit donacione perfecta et irrevocabili bona et matura deliberacione prehabita ad structuram claustri seu cenobii predicti. Primo enim donavit capellam sancti Michahelis⁵ sitam in dicto oppido Vcznach cum omnibus suis iuribus fructibus redditibus et obvencionibus suis universis pascuis pratis agris nemoribus et aliis iuribus quibuscumque ad ipsam capellam sancti Michahelis spectantibus necnon cum omnibus libertatibus et privilegiis, que ipsa capella nunc habet vel in posterum acquirere posset, hoc salvo quod retinuit domum et curtim cappellani, in qua cappellanus eiusdem capelle pro nunc moram trahit. Eciam donavit omnes curtes a domo Alberti dicti Volgers usque ad horreum dictorum dominorum comitum et in tali amplitudine, sicut signa circa capellam posita sunt. Item donavit duo iugera vitium et duo iugera agrorum vulgariter dicta im Glend⁶, sicut et seps comprehendit, que quatuor iugera continuantur a superiori parte novalibus dictorum dominorum comitum et ab inferiore parte ad campum dictum et nominatum das Lo^eli⁷ et a tercia parte ad vites eorundem dominorum comitum. Item donavit parrochiam sive plebanatum in Vcznach in antiquo opido Vcznach situatam cum omnibus suis iuribus et privilegiis, ita tamen quod si dictus plebanatus quovismodo impediretur, ita ut preceptor ordinis sancti Anthonii vel eins successores in eodem claustro seu cenobio degens fructus redditus et proventus a dicto plebanatu cedere debentes percipere non possent modo quovis, tunc ipse dominus Donatus comes constituit et donavit tot redditus et proventus, sicut et dicto plebanatui cedere possent de omnibus suis suorumque successorum bonis eciam optimis que habent, et ista ordinavit in perpetuum valitura, et quantocius dictus plebanatus secundario pacatur, ita ut ipsi in claustro predicto degentes quieti existunt et possessionem eorundem fructuum et proventuum a dicto plebanatu cedere debentes obtinent, tunc ulterius nichil de bonis comitum predictorum seu suorum successorum percipere debent nisi secundario et iterum talia inpedimenta ipso claustro seu cenobio occasione dicti plebanatus evenirent, tunc semper tot redditus et proventus, quod a plebanatu predicto habere possent, de bonis ut predicitur predictorum dominorum comitum suorumque successorum percipere debent. Item donavit unum vivarium situm an dem alten stettbach ad edificationem claustri predicti, ubi duo sunt posita vivaria, et preceptor unum recipere et eligere potest et debet quod vult. Donavit eciam omnia et singula bona prescripta ad edificacionem claustri predicti, ita quod dominus abbas sancti Anthonii necnon preceptor dyocesis Const(anciensis), qui pro tempore fuerit seu fuerint, eadem bona donata seu donanda alienare distrahere seu vendere a dicto claustro seu cenobio non debent, sed divinus cultus augeri de bonis predictis in claustro seu cenobio predicto reservando sibi et successoribus suis advocaciam eiusdem claustri seu cenobii defendendo iura et privilegia ac omnia alia et singula, que ipsum claustrum nunc habet seu habere et acquirere in posterum posset. Volens eciam dictus dominus Donatus comes, quod subditis circa ecclesiastica sacramenta adhibenda provideant occasione plebanatus predicti et ipsi subditi eisdem tamquam patribus ipsorum spiritualibus in temporalibus reverenciam et in spiritualibus obedienciam debitam impertire debeant et consuetam, quodque ipse dominus preceptor nunc in festo sancti Johannis Baptiste proxime venture a data littere presentis racione donacionis predicte domicilium in oppido Vcznach predicto per se habeat cum duobus sacerdotibus honestis tam plebanatum quam capellam inofficiet debite et cum effectu et ipse dominus preceptor procuret semper in diebus dominicis et festivis vesperas et missas a predictis prespiteris in dicto claustro cantari, donec dictum claustrum in fructibus et^a) redditibus tantum et in tanto augeatur, quod ipse preceptor vel suus successor possit cum duobus dominis sui ordinis bene nutriri, et tunc ipsi debent legere et cantare suas horas canonicas, quemadmodum ordo ipsorum in monasterio seu claustro sancti Anthonii requirit, et postquam plures redditus devenient, ita quod exinde plures nutriri possunt, iterum plures sui ordinis recipere debet semper numerum personarum augmentando iuxta facultates ipsius claustri et redditus, et quidquid interim donatur preceptori seu suis successoribus occasione edificacionis claustri predicti a personis quibuscumque, omnes iste donaciones debent transire ad structuram claustri predicti dolo et fraude penitus semotis. Promisitque prefatus dominus Chabertus preceptor, omnia et singula premissa de ipso scripta bona fide sacrosanctis tactis ewangeliis cum effectu, in quantum potest et in eo est, adimplere dolo et fraude in permissis penitus semotis. Et ut de premissis omnibus et singulis unum vel plura publicum seu publica meliori modo et forma conficerem instrumentum seu instrumenta, prefate partes me notarium publicum subscriptum requisierunt. Acta sunt hec anno indictione pontificatu mense die hora et loco quibus supra, presentibus discretis viris dominis magistro Johanne Riethein canonico ecclesie sanctorum Felicis et Regule Thuricensis⁸, strennuo viro domino Heinrico de Wa^vgenberg⁹ milite, Johanne Engelfrid, Johanne dicto Salmen presbiteris dicte Constan(ciensis) dyocesis et dicto Liechtenstein de Haldenstein¹⁰, Heinr. Oswaldi de sancto Johanne¹¹ armigero et Heinr. dicto Schubinger ministro opidi Vcznach predicti testibus ad premissa vocatis pariter et rogatis. Subscripcio vero notarii talis est: Et ego Berchtoldus dictus Fryge de Phullendorf¹² clericus Constan(ciensis) dyocesis publicus imperiali auctoritate notarius iuratus, quia premissis omnibus et singulis, dum sie ut premittitur agerentur et fierent, una cum prenominatis testibus tempore et loco quibus supra presens interfui eaque sie fieri vidi et audivi, ideirco presens publicum instrumentum manu mea propria scribendo exinde confeci et in hanc publicam formam redegi signoque meo solito et consueto signavi per prefatas partes rogatus et requisitus in testimonium omnium premissorum.

Source Fulltext: Chartularium Sangallense IX, Nr. 5354, S. 23-26.