Allen den, die disem^a) brief ansehent lesent oder ho^eren lesen, tůn wir der burgermaister der amman der ra^vt vnd die burger gemainlich der statt zů sant Gallen kunt vnd veriehent offenlich mit disem brieff fúr vns vnd fúr alle vnser nachkommen, das wir mit gůter vorbetrachtung vnd nach erkantnúß richer vnd armer zů sant Gallen mit dem erwirdigen vnserm gnedigen herrn abbt Jo^erien von gottes gnaden abbt zů sant Gallen vnd mit dem conuent gemainlich desselben closters lieplich vnd frúntlich v´berain komen sien vmb die sto^esß vnd mißhellung, so wir mit inen vnd sy mit vns vntzher uff disen hútigen tag, als dirr brieff ist geben, mitenander gehebt hand, als hienach geschriben sta^vt. Des ersten das wir vnd alle vnser nachkomen ja^erlich ye zů sant Johanns tag des To^effers ze sunngichten vnd zů sant Johanns tag ze wienna^echten an vnser vorgenanten herrn vnd an sin nachkommen an der abbtie ainem ra^vt fordren vnd von im nemen so^ellen vnd das o^vch er vns den ie denn geben vnd erloben sol, als von alter vntz her sitt vnd gewonlich gewesen ist, on all geuerde, vnd das der selb ra^vt vmb ainkain sach richten sol, die fúr ainenn amman geho^er. Es sol o^vch ain amman vsser dem rat nit gan, wenn sy von ains herren vnd des gotzhus wegen zů sant Gallen reden wend, es sig denn, das wir zů den ziten mit aim herren zů sant Gallen sto^essig sien vnd wir von der selben sto^eß wegen reden wellen, darumb mag ain ra^vt ainen amman wol haissen vsgan, vntz das die red vnd fra^vg volfu^ert wirt, on geuerde. Wa^er aber, das in dem ra^vt vmb dehain sach geredt wirt, die ainen herren vnd dem gotzhus zů sant Gallen zugeho^ert, das mag ain amman in dem ra^vte wol versprechen, duchti aber den amman, das es im ze ha^efftig wa^er, so mag er das fúr ainen herrn zů sant Gallen bringen. Es sol och ain rat von vnsers vorgenanten herrn noch von vnser^b) nachkommen hofgesind noch von pfaffen noch von schůlern nit richten, wenn das sy by den gesetzen bliben sond, als vnser herr ze sant Gallen vnd och wir darumb vormals mitenander v´ber ain komen sind. Es sol och ain ra^vt kain gotzhus wib noch mann fúr si nit gebieten, die vnser burger nit sint, es wa^er denn, das sy feruelent^a) in den gerichten zů sant Gallen. Es sol och menglich, er sy burger oder nit, vmb gelegen gůt vnd erb vnd vmb erbschafft von dem andern recht nemen vor dem amman, do er hin ho^ert, als von alter vntz herr recht sitt vnd gewonlich gewessen ist, vnd so^ellen och wir noch der rat dz nit sumen. Was aber iemant zů dem andern ze sprechen ha^vt von geltschuld wegen, do mag iedermann recht vmb nemenn vnd sůchen, als vntz herr sitt vnd gewonhait gewessen ist. Es mag o^vch ain amman ainen sinen frúnd oder gesellen, weihen er wil, der des ra^vt ist, bitten, dz er vnsers herrn vnd des gotzhus ze sant Gallen recht in den ra^vte vordre an siner statt in aller der wise, als ob er selb dasa^eß, vnd sond ouch wir noch der ra^vt den daran nit sumen. Es sol och vnser vorbenanter herr vnd sine nachkomen vns ainen stattamman geben, wenn er wil vnd ain erber man ist vnd burger zů sant Gallen ist, vnd sol o^vch der richten, als von alter vntz her sitt vnd gewonlich gewesen ist. Wa^er och, dz vnser vorgenter^c) herr zů sant Gallen ald sin nachkommen selber vff der pfallentz zů sant Gallen nit richten wo^elt ald mo^echt, so sol er ainen probst ze sant Gallen oder ainen vnser herrn des capittels, welhem er wil, empfelhen ze richten vff der pfallentz an siner stat, als dick es noturfftig ist ze glicher wis, als ob er selbir da richte, on allein vmb rechte lehen. Wir so^ellen och enkain des gotzhus wib noch man zů burger nit empfahen, wenn^d) die zů sant Gallen in der statt dannenhin hablich bi vns sitzen mit husro^echi, als von alter vntz her sitt vnd gwonlich gewesen ist. Wa^er aber, das vnser vorgenanten herrn ald sin nachkommen ald ire amptlút duchti, das dhainer mit husro^echi dannenhin nit sa^eßi, den wir ze burger empfangen habint oder noch ze burger empfahent, als vorgeschriben sta^vt, wo denn vnser vorgenant herr ald sin nachkommen oder dehain ir amptlút swerent ainen gelerten aide zů den hailigen vnd zwen erber man mit im, die im des helffent, das er sin burgrecht nit gehalten habi, als vorgeschriben sta^vtt, so so^ellen wir dannenhin desselben lib noch gůt vor vnserm benenten herrn noch vor sinen nachkommen nit schirmen, o^vne edel lút, die mugent sitzen, nach dem so sy burger werdent, wo es in fu^eglich ist. Es sond och alle sunder gu^eter, die inwendig den vier crútzer ze sant Gallen gelegen sind, mit stu^eran mit diensten vnd mit allen gewonhaiten beliben, als sy vnser her selig abbt Hermann bracht ha^vt vntz in sinen tod, on geuerde. Wa^er och, das dhain vnser burger sin gůt, es sig lantgůt oder sunder gůt, das vssrent den vier crútzen zů sant Gallen gelegen ist, selbir buwen wo^elt oder von im lihen vnd den duchti, das uff sine gu^eter mer stúr gelait warent, dann er dauon billich geben so^elt, so sol vnser herr oder sin nachkommen ald ir amptlút dry der na^echsten nachpuren nemen, sy sient burger oder nit, vnd sond ouch vnßer herr vnd wir die selben darzů bringen, das sy das tu^eynt, vnd sond die dry das gůt besehen vnd sond darnoch sweren gelert aid zů den hailigen, wie sy dunckt, dz man das gůt besetzen mo^echt v´ber die zinß, die vnßer herren vnd dem gotzhus daruss gant, vnd was sy darumb gemainlich oder der mertail vnder inen sprechent, des sond sy denn drytten pfenninng von dem gůt ze stúr geben, vnd sol och des vnsren vorgenanten herren vnd sin nachkommen von dem selben gůt benu^egen. Wir so^ellen o^vch die múntzmal vnd die gewicht, die zů der múntz geho^erent, vnd die fronwag zů sant Gallen dem múntzmaister inantwúrten, vnd sol och der die fronwag vnd als meng wag wir noturfftig syent, henken an die stett, do vns dunckt, das es vns notdurfftig sig vnd aller fu^eglichest, vnd sol och der múnsmaister alle gwicht besehen vnd v´ber schlahen, als dick es noturfftig ist, vnd sond och die gewicht beliben by dem lo^vn, als von alter vntz herr sitt vnd gwonlich gewesen ist. Es sond och die múller, die die vier múlinen hant vor Hústor, fúr ainenn hofamman zů gericht gon, als es von alter herkomen ist vmb die sachen, so die selben vier múlinen antreffent. Es sond och alle pfister zů sant Gallen zů den selben vier múlinen maln vnd farn, als von alter sitt vnd gwonlich gewessen ist. Wir haben och gwalt, die múlistatt vnd múli vor Spiser tor ze buwenn hinnanhin, wenn wir wellent, vnd sond vnserm vorbenanten herrn sinen nachkommen vnd dem gotzhus von nu sant Gallen tag dem na^echst v´ber ain jar vnd dannenhin ja^erlich vnd eweclich dauon geben vnd richten, als von derselben múli von alter sitt vnd gwonlich gewesen ist, o^vn alle fúrzug, wir buwen die múli oder nit. Wir so^ellen och ainen erbern mann vnser burger vnser rathus vnuerzogenlich haissen empfahen von vnserm benanten herrn, als gwonlich ist zů sant Gallen húser zů empfahen, vnd wenn der, der es empfangen ha^vt, abstirbt, als dick das beschicht, so so^ellen wir es ainen andren vnsern burger haissen empfahem^a) vnd so^e) vnser vorgenanter herr ald sin nackomen im dasselb ra^vthuß lihen in aller wise, als vorgeschriben sta^vt. Es sol och ain burmaister^f) des múnsters zů sant Gallen den schopf von der kilchen zů sant Lorentzen hinuff vntz an das hofftu^erli besorgen vnd des pflegen, vnd was im dauon vorbestan mag úber das, des derselb schopf noturfftig ist, das sol er legen vnd geben an des múnsters buw. Bescha^ech och, das dehain wib oder man zů sant Gallen ainander zů gemaindern nemen wo^ellent, das sond sy tůn vor ainem allichen gericht, vnd sond och die, die denn do ainander zů gemaindern nement, die gemaind dannenhin niessen, als recht ist, wa^er^g) aber das nit ta^ett, zů dem sol vnser vorgenant herr ald sin nachkommen sins rechten wartent sin. Beschech och, dz dehain gotzhus wib ald man in den spital zů sant Gallen ka^em in sinem todbett vnd da absturb, die sol vnser vorgenant herr vnd sin nachkommen vnd ir amptlút erben in glicher wiß, als ob sy hie vss wa^erint abgesturben. Was och der spital dienstlút hat, es sy wib oder man, oder noch inna^ement, die des gotzhuß zů sant Gallen sind, die in dem spital absterbent, die sol och vnser vorgenanter herr sin nachkomen vnd ir amptlút erben an dem vnd sy land zů glicher wiß, als ob sy hieuss abgestorben wa^erint. Beschech ouch, das dhain frow oder man, die des gotzhuß sind, ir varendt gůt in den spitall geben wo^elltent, das mugent sy tůn, doch also dz die spitalmaister, die denn maister vnd pfleger sind, vnserm vorgenanten herrn vnd sinen nachkomen mit iren trúwen an ains geswornen aids statt lehen^h) sond, das sy noch niemant von iren noch von desselben spitals wegen dem selben, der denn das gůt in den spital geben ha^vt, noch sinen erben noch niemand von sinen wegen gantzlich noch an dehainenn tail weder bi sinen leben noch nach sinem tod wider geben noch wider kerren sond, wenn das es dem spital ru^eweclich vnd vnansprach beliben sol. Beschech och, das dehain wib oder man, die des gotzhus sind, ir varend gůt in den spital gebe vnd och selber do mit in den spital ka^em vnd darinne abstúrb, den sol vnser vorgenant herr sin nachkomen vnd ir amptlút erben an dem, so er lat nach sinem tod v´ber das, das er in den spital vormals bracht vnd geben hat, in glicher wiß, als ob er hievsse abgestorben were. Es múgent och die spitalmaister denselben, die in den spital komen sind, es sien frowen oder man, sy habent ir gůt do hin geben oder nit, vrlob geben vnd och sy vrlob nemen, wemⁱ⁾) sy wellent vnd inen fu^eglich ist, vnd doch also, dz das gůt, das in den spital geben ist, dem spital ru^ewenlich beliben sol. Es sond och die spitalmaister ain ieglichen, den sy in den spital emphahen wend, es sig frowen oder man, sagen, wie sy die in den spital empfahen sond, als vorgeschriben sta^vt. Es ist och sunderlich vssbedingt vnd beredt, was vnser vorbenemten herre vnd das gotzhus zů sant Gallen gegen vns vnd der statt ze sant Gallen vnd wir vnd die statt ze sant Gallen geben im vnd dem gotzhus ander recht fryhait vnd gůt gewonhait habint one die stuck, die hieuor an disem briefe verschriben sta^vnt, das wir daby vnd darumb gegen ainander beliben vnd besta^vn so^ellent, als von alter vntz herr recht sitt vnd gewonlich gewesen ist, on all geua^erd. Vnd zů offem warem vrkúnd vnd sta^eter sicherhait diser vorgeschribner richtung vnd aller der stuck, so hie vor an disen brieff verschriben sta^vnt, haben wir vnser vnd der statt zů sant Gallen gemain insigel fúr vns vnd fúr alle vnser nachkommen offenlich gehenckt an disen brief. Diß beschach vnd ward der brieff geben zů sant Gallen in der statt an dem nehsten samststag^a) vor sant Vrbans tag in dem ja^vr, do man zalt von Crists gebúrt drúzehen hundert jar, sibentzig jar vnd darnach in dem dritten jare.

Source Fulltext: Chartularium Sangallense IX, Nr. 5357, S. 30-33.