Allen^a) den, die disen brief an sehent oder ho^erent lesen, kúnd ich Albreht von Lindenberg schulthais ze Wil¹ vnd vergih des || offenlich mit disem brief, das ich offenlich ze gericht sass da selbs ze Wil in der stat an offem verbannem jargericht an || der na^ehsten mitwochen nach vsga^enter osterwochen, vnd kam da fúr mich in offen jargericht die ersam gaistlich frow || in got Adelhait Trůngerin priolin in der samnung ze Wil² vnd clegte da vor mir von ir vnd des conuentz wegen mit fúrsprechen vnd sprach, das die strasse von der Klaffenten Múli³ entzwischent irm garten vnd Markus Kamrers vnd och Burkart des Risen wisen vntz an Búrgis Ammen garten alwent als vol wassers swebti, das man dauon gebresten hetti, das nieman da von wasser gewandlen noch gan mo^ehti, vnd solti ain offen grab gan durch Burkart des Risen wisen, da das wasser sinen vollen ganch vnd fluss durch hetti von der strâs, das die trochen belib, vnd das man och in die selben strâs nit stro^ewen noch bv^ ze samen schlahen so^elt vnd wa^er och vormals das mit reht vnd mit kvntschaft behebt, das das also sin vnd bliben solti. Vnd baten mich vorgenanten richter ze erfarn ân ainer vrtail, was reht wa^eri. Do fragte ich vorgenanter richter vrtail vmb vnd ward mit gesamneter vrtail ertailt, es wa^er offen vnd kvntlich, das man och vormals darumb gerechtot vnd kvntschaft gelait hetti vnd das es mit kvntschaft behebt wûrd, das es also wa^er vnd bliben solti vnd das es och noch hinnen also bliben sol, das Burkart der Ris ainen offenn graben durch die vorgeschriben sin wisen haben sol, das das selb wasser sinen vollen ganch vnd flus durch die selben sin wisen von der strâs haben sol vntz an der vrowen wisen in der samnung vnd sús denn fúrbas vertegon sont, da es denn sinen fluss hin haben sol, ân geuerd, vnd das och in der vorgeschriben strâs zwischent den zv´nen, als verre als vor ist beschaiden, nieman stro^ewen noch ainkainen bv^ ze samen schlahen sol in kain wis, vnd wer das v´berfert vnd nit haltet, das sú den darvmb in dem wochen gericht, als man den burgern gewonlich richten sol, wol beklagnen vnd das reht von im sůchen sont, als dik das beschiht. Vnd als dis also beschaidenlich volfu^ert was, do batt ir die egenant Adelhait Trůngerin priolin da vorgenant zů iro vnd des conuentz handen vnd wegen des gerichtz brief hierúber geben, die wurdent ir nah miner frage mit gemainer vrtail ertailt. Vnd des vnd hierúber ze ainer warhait aller vorgeschribener ding han ich Albr. von Lindenberg schulthais da vorgenant min insigel von des gerichtes wegen offenlich gehenkt an disen brief. Der geben ist ze Wil in der stat an der vorgeschriben mitwochen, do man zalt von gottez gebúrt drúzehenhvndert jar, sibentzig jar, darnach in dem vierden jar.

Source Fulltext: Chartularium Sangallense IX, Nr. 5401, S. 75.