Allen^a) den, die disen brief an sehent oder ho^erent lesen, kúnden wir der vogt vnd der râte der statte ze Ra||preswile¹ von der sto^ess vnd misshellung wegen, so gewesen sint zwúschent denen erwirdigen gaistlichen || herren dem . . abt vnd dem conuent dez gotzhûs ze Rúti² vnsren burgern vnd Cůnr. Siglin von Verrich³ och v´nserm || burger von dez gu^etlins wegen, daz gelegen ist ze Verrich vnd haisset dez Metlers gůt, vnd ains mútt kernen geltes wegen, daz der vorgenant Cůnrat Sigli anspra^echig hatte, daz es sin lipding wa^er, daz wir die vorgenanten sto^ess vnd misshellung, wie vnd ine^b) weler wise die vf geloffen waren von dez vorgesaiten lipdings wegen, ga^entzlich vnd gar verriht vnd zer lait haben mit der beschaidenhait, daz der vorgenant Cůnrat Sigli an dez vorgesaiten . . abtes hand vf geben vnd sich ga^entzlich vnd gar entzigen hat aller der vordrung ansprach oder rehtes, so er oder kain sin erben oder nachkomen hett gehebt oder hinnenhin iemer me gehaben mo^ehte zů dem vorgeschriben lipding, oder von kainer ansprach, die von dez selben lipdings wegen vf gelo^vffen mo^eht nu vnd her nach oder vntz her vf geloffen war, in kainer wise. Ez ist o^vch bedinget vnd beredet, daz der vorgenant abt Hainrich⁴ vnd der conuent dez vorgenanten gotzhûs noch ir nâhkomen den vorgesaiten Cůnrat Siglin noch sin erben von dez vorgeschribenen lipding wegen vmb kainen v´bernútze noch schaden hinnenhin niemer me vf getriben noch angesprechen sont mit gaistlichen noch mit weltlichen gerihten noch in kainer wise. Vnd dez ze ainem waren vnd offemm vrkúnde vnd merer sicherhait so haben wir der vorgenant vogt vnd der râte der statt ze Rapreswile v´nser statt aygen insigel offenlich gehenkt an disen brief. Der geben ist ze Rapreswile in der statt in dem jare, do man zalt von gottes gebúrt drúzehenhundert jare, sibentzig jare, dar nach in dem vierden jare, an sant Georien tag dez hayligen martrers.

Source Fulltext: Chartularium Sangallense IX, Nr. 5403, S. 77-78.