Ich Johans von Wolhusen werchtegan des gotshus ze sant Gallen¹ tun kunt vnd vergich offenlich mit disem brieff allen, die in sehent oder hörent lesen, das für mich kam ze sant Gallen der ersam Gerwig Blârrer burger ze Costentz und offnet und veriah vor mir offenlich für sich und sin erben und sprach, das er die müli und mülistat am Espan², die ainhalb stösset an Stainerbach³ und andrnthalb an die aker gen Stainbassenhusen⁴, die min closter lehen ist, mit akren mit wisen mit holtz mit velt mit wasser und mit wasserflüssen und gengen und mit allen rechten nutzen und gewonheiten, so darzu gehörent und gehörn sont von recht und von gewonhait, es sie benempt ald unbenempt und als er dieselben müli und mülistat vnts her vff disen hütigen tag, als dirr brief ist geben, inne gehept und genossen het vnts an zehen schilling pfenning Costantzer münse järliches zinses, die er im und sinen erben in dem selben hoff vs bedinget und behalten hat, als hienach geschriben stât, recht und redlich verko^vft und ze ko^vffen geben het dem beschaidenen knecht Hainrichen Rutzenwiller und sinen erben, ob er einwär, umb drissig pfundt pfenning guter Costentzer münse, derselben pfenning er von dem selben Hainrichen gantzlich gewert wär und empfangen het und an sinen offen nutz bewendet, und gab da der selb Gerwig Blarrer die selben müli und mülistat mit akren mit wisen mit holtz mit velt mit wasser und mit wasserflüssen und gengen und mit allen rechten und zugehörden vnts an die vorgeschriben zehen schilling pfenning zinses und järliches geltes an min hant vf und bat mich es lihen dem vorgenenten Hainrich Rutzenwiller, do erhört ich sin bet und leh und liehe mit disem brieff dem vorgenenten Hainrich Rutzenwiller die vorgeschribne müli und mülistat mit allen rechten nutzen und gewonhaiten und mit aller zugehörde, als vor ist beschaiden, ze lehen, und verzêh sich o^vch do derselb Gerwig Blarrer und verzihet sich mit disem brieff für sich und sin erben aller aigenschaft aller lehenschaft alles rechten gaistlichs weltlichs gerichtes aller vordrung und ansprachen, so er ald sin erben zu derselben müli und mülistat und was darzu gehört, als vor ist beschaiden, vnts an die vorgeschriben zehen schilling pfennig järliches zinses ie gehatet oder hie nach iemer gewinnen möchtint. Vnd lobt öch do der vorgenent Blarrer für sich und sin erben, des vorgeschribnen köffs und der selben müli und mülistat mit allen rechten, als vor ist beschaiden, recht wer ze sinne nach des landes recht und den vorgenenten Hainrich Rutzenwiller und alle sin erben und nachkommen darumb ze versprechen und ze verstanne a^vn allen iren schaden gen allermänlichen an gaistlichem und an weltlichem gericht und an allen steten, wâ und wenn oder wie dik si des bedurffent ald darumb von jemann angesprochen geschädiget oder vf getriben werdent, und die vorgeschribenn zehen schilling pfenning järlichs zinses, die der vorgenent Blarrer an disem köff vs bedinget und behalten hat, als vorgeschriben sta^vt, sol der selb Hainrich und sin erben und nachkomen, in dero hant die selb müli und mülistat jemer kumt, demselben Blarrer und sinen erben, ob er einwer, von derselben müli und mülistat und was darzu gehört aller järlich ie ze sant Gallen tag gantzlich geben und rihten a^vn allen desselben Blarrers schaden und sin erben, ob er einwär. O^vch ist beret umb den graben, der durch des vorgeneten Blarrers aker ga^vt und das wasser fürt vff dieselben müli, das der vorgennet Hainrich Rutzenwiller und sin erben und nachkommen den selben graben rümen sont und mugent, als dik si sin not durftig sint ze den ziten in dem jare, so es dem aker aller unwustlichost gesin mag, a^vn alle geuärde, und soll derselb Blarrer noch sin erben noch nachkomen si daran nicht sumen noch nieman von ir wegen, war o^vch das derselb Blarrer für sich und sin erben recht wer sin sol. Es ist och mer beret, beschäch das der vorgenent Gerwig Blarrer ald sin erben und nachkomen vf ir blaichi iemer blaichent wurdint, da si vormals o^vch geblaicht hant, das si dann ain wal tun und anders nüt bi derselben müli buwen sont und mugent, und war, das die vorgeschriben müli da von gebresten gewunni an wasser, wenne und als dik das beschäh, so soll der selb Blarrer ald sin erben, ob er einwär, und der vorgenent Hainrich Rutzenwiller und sin erben und nachkommen jetwedere tail ainen erbarn man darzu nemmen, und was die selben zwen dunkht, das si im ald sinen erben und nachkomen für selben sumsäli und gebresten, so dann dieselb müli an dem wasser gewinnet, ze bessrung tun und geben sölint, das sol der selb Blârrer und sin erben und nachkommen inen a^vn fürzug vs richten und geben. Beschäch o^vch das die wedre von sinen rechten der vorgeschribenen müli und mülistat und was darzu gehört gan und die verkoffen wölt, der sol es dem andern des ersten vail bieten und vor mänlichem ze koffen geben, ob er es koffen wil, wölt er aber nit ko^vffen, so mag der verkoffen wolt recht wol ze koffen geben, wem er wil, dem andern an sinen rechten gantzlich unschädlich, dasselb ist och gen iro baider erben bedingot. Und des alles, so hie vorgeschriben stat, ze offemm wa^vren vrkunde so han ich Johans von Wolhusen werchtegan des vorgenenten gottshus ze sant Gallen min insigel gehenkt an disen brief mir und minen nachkommen und dem gotshus ze sant Gallen gantzlich unschädlich an sinen rechten, und ich der obgenant Gerwig Blârrer vergich offenlich, das alles das wâr ist und vollefürt ist, dz der erwürdig min herre herr Johans von Wolhusen da vorgennet von mir veriehen hat an disen brief, und des ze merer sicherhait so han ich och min insigel gehenkt an disen brief für mich für min erben und nachkomen. Dirr brief ist geben ze sant Gallen an sant Mauricius tag und siner gesellschaft in dem jare, do man zalt von Christus geburt drizehen hundert jär, sibentzig järe und darnach in dem vierden järe.

Source Fulltext: Chartularium Sangallense IX, Nr. 5417, S. 91-93.