Allen, die disen brief an sehent oder ho^erent lesen, kúnd ich V^olrich von Múnchusen¹ Hainrichs sa^elgen sun von || Múnchusen, den man namt den Kelner von Tuggen², als mir min gena^ediger herre abbt Johans dez gotzhus ze || Pfa^euers³ sant Benedicten ordens in Churer bistum die gnâd getân vnd mir daz lêhen, daz wilunt die von || Rôsenberg⁴ vss dez vorgenanten gotzhus kelnhoff ze Tuggen hattent, daz da giltet zwên mút kernen sehs mút habern vnd ain phunt Zúricher phenning, von gnâden ze minem lip vnd ze end miner wile vnd nit fúro verlihen hett, als ôch an dem brief, den ich darumb von im hân, verschriben ist, daz ich da offenlich vnd vnbetzwungenlich fúr mich vnd alle min erben veriehen hân vnd vergih mit disem brief, daz ich daz selb lêhen also von im vff genomen vnd enphangen hân mit den gedingten vnd beschaidenhait, wenne oder ze weler zit ich von tôdez wegen ab gân vnd ab gangen bin, daz kain min erbe nôch nâchkomenn noch niement ander von minen wegen kain reht kain vordrung noch kain ansprâch zů dem selben lêhen vnd gůt me haben noch in dehain wis niemerme gewinnen sônt noch múgent, wân daz es dem ob genanten gotzhus gar vnd gentzlich frilich vnd lidklich ân alle bekrenkung vnd widerred ledig vnd lôs sol sin. Wa^er och, daz ich ald min erben kainen alten vnd ander brief von dez ob genanten lêhens wegen inne hettint ald kainer hienach funden wurd, die sônt dem ob genanten gotzhus kainen schaden bringen nu noch hienach. Vnd ist och dis allez beschehen vollebrâht vnd vollefu^ert mit allen den worten vnd werchen gehúgden vnd geta^eten, so darzů gehort gewonlich vnd nottúrftig waz vnd ze den ziten vnd an den stetten, do es wol kraft vnd maht hett. Vnd dez allez ze wârem vnd offem vrkúnd, wân ich der ob genant V^olrich von Múnchusen aigens insigels nit enhân, so hab ich Růdolfen Spervogel burger ze Raprehtzwile⁵ erbetten, daz er sin insigel hât gehenket an disen brief. Ich Růdolf Spervogel burger ze Raprehtzwile durch ernstlich vnd emsig pett willen V^olrichs Hainrichs sa^elgen sun von Múnchusen vnd och ze ainer gezúgnúst vnd gantzer wa^vrhait aller der vorgeschribenn ding hân min aigen insigel geben vnd gehenket an disen brief. Der geben ist ze Raprehtzwile am na^ehsten dunstag nach sant Agnesen tag in dem ja^vr, do man von Cristus gebúrt zalt drúzehen hundert vnd sibentzig ja^vr, darnâch in dem vierden jâre.