Ich^a) Cůnrat der Wolffegger verrgich vnd tůn kunt fúr mich vnd fúr all min erben allen den, die disen || brieff lesent oder ho^erent lesen, das ich gesundes libes sinnes vnd och můtes mit gůter zitiger vorbetrachtung || han verkouft vnd ains rechten redlichen koufs han ze kouffent gegeben vnd gib mit vrkúnd ditz briefs dem || erberen vesten Cůntzen dem Sa^eyger burger ze Rauenspurg¹ vnd allen sinen erben vnd nahkomenden minen zehenden ze Wergiswise² grosen vnd klainen mit aller siner zůgeho^erde vnd och minen zehenden ze Ettenkirch³ nemlich dú zwai tail och grosen vnd klainen mit aller siner zůgeho^erde, vnd han im die selben benempten zehenden gegeben mit allen ieren rechten nútzzen vnd gewonhaiten, die von recht oder von gewonhait zů den selben zehenden geho^erent oder geho^eren sond, fúr ledigú vnanspra^echigú gůt vnd fúr recht lehen von dem erwirdigen gotzhus sant Gallen, von dem selben gotzhus ich im die benempten zehenden han geuertget vnd in sin hand brach, swie recht ist nach lehens recht vnd gewonhait, wie es von recht craft vnd macht sol vnd mag han vff gaistlichem vnd vff weltlichem gericht, vnd han im och die selben benempten zehenden gegeben mit allen rechten vnd gemainlich in aller der wise, als ich si bis her besessen vnd genossen han vnd als si an mich bekomen sint, vnd han dar vmb von dem benempten Cůntzen dem Sa^eyger vmd die selben zehenden in rechtes koufs wise enpfangen sechtzig pfund pfenning gůter vnd gena^emer Costencer múns, der ich von im gentzlich bin gewert vnd och si in minen nútz bewent vnd beschiben han, vnd dar vmb so han ich mich vnd min erben fúr mich vnd fúr min erben in des benempten Cůntzen des Sa^eygers vnd in aller siner erben hendde des benempten zehenden ze Werwiswise^b) vnd des zehenden ze Ettenkirh der zwaiger tail vnd aller iero zůgeho^erde entzigen vnd verzich mit vrkúnd ditz briefs vnd han inen die geuertget vnd vff gegeben, wie recht sitt vnd gewonlich ist, also das ich noch kain min erben noch niement von minen wegen den benempten Cůntzen den Sa^eyger noch sin erben an den benempten zehenden noch an ieren zůgeho^erden nit so^ellent sumen irren noch bekúmbern noch kain ansprach an si gewinnen weder a^vn gericht noch mit gericht gaistlichem noch weltlichem noch mit kainen andren sachen, da mit wir wider disem kouff mo^ehtent gewerben oder getůn in den hain wise. Ich sol och vnd alle min erben vnd mit v´ns der vest Růdolff von Ebersperg⁴ des benempten Cůnzen des Sa^eygers vnd aller siner erben recht weren sin nach recht vff die benempten zehenden vnd vff ir zůgeho^erde vnd vff den benempten kouff, wa oder wenn vnd wie dik si des bedurffent vnd notdurftig sint vff allen gerichten gaistlichen vnd weltlichen gen menglich nach lehens recht vnd gewonhait a^vn geua^erde. Den selben Růdolff von Ebersperg sol ich vnd alle min erben von der selben werschaft ledgen vnd lo^esen gentzlich an allen ieren schaden. Vnd des alles, so da vor verscriben stat, ze waurem sta^eten vnd offem vrkúnd gib ich Cůnrat Wolfegger obgenant dem benempten Cůntzen dem Sa^eyger vnd sinen erben disen brieff fúr mich vnd min erben besigelten mit minem aigenem^c) angehenktem insigel. Ich Růdolff von Ebersperg verrgich vnd geloben, die vorbedachten wereschaft ze laistent vnd ze haltent, als da vor von mir verscriben stat, vnd des ze offem vrkúnd han^d) min aigen insigel gehenkt an disen brieff. Der geben wart an dem na^ehsten fritag vor dem hailigen tag ze wihenna^ehten, do man zalt von Crists gebúrt dritzehenhundert vnd vier vnd súbentzig jaur.

Source Fulltext: Chartularium Sangallense IX, Nr. 5429, S. 106-107.