Allen den, die disen brief an sehent oder ho^erent lesen, tu^en wir Berchtolt von Wittenwille¹ priester vnd ze disen ziten capplan ze Griffense² vnd Hylpolt von Wittenwille burger ze Wil³ gebrůder kvnt vnd veriehen des offenlich || mit disem brief fúr v´ns vnd fúr alle v´nser erben vnd nahkômen, das wir mit gůter vorbetrahtung vnd beschaidenhait nach v´nser frúnd vnd ander wiser lút rât ains rehten vngeua^erlichen wehsels v´berain komen sint mit || den erwirdigen gaistlichen frowan fro Yten von gottes verhengde a^ebtischinnen geborn von Slatt⁴ vnd dem conuent gemainlich des gotzhus ze Ta^ennikon⁵ in Costentzer bystum, das wir inen iren nahkomen vnd dem || selben irm gotzhus das gůt ze Mos⁶ múli vnd múlstat gelegen zwischent Gvndeltzhusen⁷ vnd Maistershusen⁸, das v´nser vnd der selben frowen vnd ir gotzhus gemainlich reht aigen was, v´nsern tail vnd alles das reht, so wir daran hatten vnd gehebt hant mit allen rehten nútzzen vnd gewonhaitten vnd mit allem dem, so von gewonhait vnd von reht zů dem selben gůt vnd darin geho^eret vnd als wirs bisher gehebt vnd genossen hant, âne den zehenden halben vff dem selben gůt v´beral, den haben wir v´ns vnd v´nsern erben behebt vnd vs bedinget, das v´ns der bliben sol reht vnd redlich als reht sitte vnd gewonlich was, gewehselt vnd geben haben fúr reht aigen vmb ir schůppos gelegen ze Haiterschan⁹ vnd vmb drissig schilling pfenning Costentzer mv´ns, die sú v´ns daruf ze vfgebung geben vnd gentzlich bezalt hant, vnd haben och ainmu^etklich mit wolbedahtem můt die vorbenemten abtischinnen vnd den conuent gemainlich des egedahten gotzhus des vorgeschriben halben gůtes múli vnd múlstat in liplich nûtzlich gewer gesetzt vnd inen och das selb halb gůt vnd alles das reht, so wir daran hatten vnd gehebt hant, âne den zehenden halben, als vorgeschriben stat, mit allen obgeschriben rehten nútzzen vnd mit aller zůgeho^erd letklich vnd frilich fúr reht aigen vf geben geuerteget vnd zů iro ir nahkommen vnd och ir gotzhus handen vnd wegen brâht, als reht sitt vnd gewônlich was. Vnd darvmb so haben wir v´ns von friiem aigenem willen luterlich vnd frilich verzigen vnd verzihen v´ns och mit disem brieue reht vnd redlich vnd och gar vnd gentzlich fúr v´ns vnd fúr alle v´nser erben gen der obgenanten abtischinnen vnd dem conuent gemainlich des egedahten gotzhus gen allen im nahkomen vnd gen dem selben irm gotzhus aller aigenschaft aller manschaft aller kvntschaft aller besatzzung aller zúgnust aller gewer lút vnd brief aller vordrung aller ansprach vnd och alles des rehten, so wir gemainlich oder dewedre besunderlich zů dem vorgeschriben gůt halbem ald zů kainem tail ald dar an ie haben gehebt ald noch hienach iemer gehaben gewinnen oder erwerben in dehain wis mo^ehtint von gewônhait ald von rehte, vnd das wir bed noch entwedre besunder vnder v´ns noch ainkain v´nser erben noch nieman andrer von v´nsren wegen noch an v´nser stat die egenanten frôwen noch ir nahkomen noch das egedâht ir gotzhus von des vorgeschriben gůtes múli vnd múlistat wegen alles noch von kains tails wegen hinnenhin niemer me súllent noch wellent ansprechen vftriben bekúmberren bekrenken noch in ainkain ander wise beswa^erren weder mit gaistlichem noch mit weltlichem gericht noch ân reht noch mit ainkainer lay ander sach, doch also, das wir vnd v´nser erben bi dem halben zehenden bliben sont, als vorgeschriben ist, ân geuerd. Wir haben och gelobt fúr v´ns fúr alle v´nser erben, die wir vestklich herzů binden mit disem brief, der vorbenemten abtischinnen vnd des conuentz ze Ta^ennikon vnd des selben ir gotzhus des vorgeschriben gůtes múli vnd múlistat ze Mos vnd och des wehsels reht wem ze sinne fúr reht aigen vnd nah aigens reht gen maniglichem vff gaistlichem vnd vff weltlichem gericht, wenn wa vnd als dik sú des bedurfent vnd notdúrfig sint, an alle geuerd. Vnd ist dis alles redlich vnd reht beschehen volfu^ert vnd volbraht mit allen worten werken geba^erden vnd geta^eten vnd mit aller sicherhait vnd versorgnust, so darzů gehorten nûtz gůt vnd notdúrftig warent von reht vnd von gewonhait vnd als es kraft vnd maht hat vnd haben sol vnd mag ietz vnd hernach. Vnd des vnd hierúber ze ainer warhait vnd sta^eter sicherhait aller vorgeschribener ding vnd gedingde haben wir Berchtolt vnd Hylpolt von Wittenwille da obgenant v´nsri insigel fúr v´ns vnd fúr alle v´nser erben offenlich gehenkt an disen brief. Der geben ist ze Wil in der stat an dem na^ehsten samstag vor sant Katherinen tag, do man zalt von gottes gebúrt drúzehenhundert jar, darnach in dem vier vnd sibentzigosten jar.

Source Fulltext: Chartularium Sangallense IX, Nr. 5424, S. 100-102.