Wir Herman von Landenberg ritter, brůder Růdolf von Landenberg sant Johans ordens, pfaff Herman von || Landenberg alle drije gebrůdere, Elisabetha¹ wilent hern Go^etfrides seligen des Trugsa^etzen von Diessenhouen² || eliche husfro^vwe ir swester vnd V^olrich von Landenberg von Griffense³ ir vetter tůn kunt allen, die disen || brief sehent oder ho^erent lesen, vnd veriechen offenlich mit disem brief, das wir mit den edlen wolerbornen herren graf Fridrich, graf Tonat vnd graf Diethelm von Tokkenburg⁴ gebrůdern v´ber ein komen sijen von des ko^vffes wegen ze Griffense⁵, vnd haben o^vch dar vmb mit gůten trúwen glopt vnd offenlich ze den heiigen gesworn, wenne wir vsser a^vcht vnd vsser bennen komen, das wir oder v´nser erben, ob wir enwerin, denn dar nach inwendig dem nechsten manot, so wir dar vmb von den vorbenemten herren von Tokkenburg allen gemeinlich oder von deheinem besunder ald von iren botten oder briefen ze hus ze hof oder vnder o^vgen gemant werden, a^elli gemeinlich vff das lantgericht ze Turgo^eiw ze der Lo^vben⁶ ald gen Hafneren⁷ komen súlent vnd den obgenanten herren von Tokkenburg vnd iren erben, ob si enwerin, die statt Griffense die bürg vnd den se mit lúten gúlt nútzen vnd gu^etern mit vogteyen gerichten twingen vnd bennen vnd mit aller zůgeho^erd da vor offenem gericht vertgen vfgeben vnd ze iren handen bringen vnd v´ns des verzihen súlent, als denn gericht vnd vrteil git, in aller der wise vnd masse, als wir Zúrich vor gericht getan haben vnd der selb brief wiset, den si mit v´nsern vnd mit des gerichtes Zúrich insiglen dar vmb besigelt inne hant, ane alle geuerd. Vnd her v´ber ze einem offenn waren vnd sta^eten vrkúnd aller vorgeschriben ding so haben wir die egenanten von Landenberg alle vier vnd die egen(ante) Elsbetha Trugsa^etzin v´nsere insigel fúr v´ns vnd v´nser erben offenlich gehenkt an disen brief. Der geben ist Zúrich an sant Vincenzijen tag, do man zalt von gottes gebúrt drúzehenhundert vnd sibenzig jar, dar nach in dem fúnften jar.

Source Fulltext: Chartularium Sangallense IX, Nr. 5435, S. 111-112.