Allen^a) den, die disen brief ansehent lesent oder ho^erent lesen, kúnd ich Friderich Blârrer || burger ze sant Gallen vnd vergich offenlich mit disem brieue fúr mich vnd fúr alle min erben, || daz ich mit dem vesten ritter hern Eglolf von Roschach¹ lieplich vnd gu^etlich v´berain komen bin von || der nâchgenemten lút wegen Hainrich Kriemlers, V^olrich Kriemlers, Herman Hasen, Cůnrat Halters, Růdolf dez Kleinen, Cůnrat Eschlers, Steffan Eschlers, Johansen am Lên², Johansen Spa^eten, Hainrich Kratzzers, V^olrich Rúschen, Hainrich Rúschen, Hainrich Stúrmen, Johansen Stúrmen, Růdolf dez Smitz, V^olrichs sines suns, Hainrich Rennhasen, Johansen Rennhasen, V^olrich Scho^eris, Růdolf Scho^eris, Hainrich Lochers vnd Johansen Scho^eris, die selben lút mir der obgenant herr Eglolf von Roschach mit lip vnd mit gůt reht vnd redlich versetzt hât fúr drúzehen phunt vnd fúr drizehen schilling phenning gůter Costentzzer múnse ze ainem rehten gewerten vnd werenden phande, alz der brief³ wol wîset, den ich darumb von im han, daz ich noch min erben, ob ich enbin, von den vorgenemten lúten enkaines jâres, die wîle sú von v´ns niht erlo^est sint, niht mêr von in ze stúr nemen súllent dann aller ja^erlich ain phunt phenning gůter Costentzzer múnse vnd darzů von iro ieklichem besunder aller ja^erlich ain vasnaht hůn vnd darzů ander gewonlich vnd beschaiden dienst, der er sú danne mit liep v´berkomen mag, ân alle geua^erde, ez wa^er danne, daz ich obgenanter Friderich Blarrer oder min erben, ob ich enwa^er, von der vorgenemten lút wegen von ieman vf getriben an gesprochen vnd geschadgot wûrdint, den schaden sont v´ns die selben vorgenemten lút o^vch gantzlich gelten vnd v^srihten ân allen fúrzug. Vnd ze ainem wâren vrkúnde vnd gantzzer sicherhait aller der vorgeschribenen dinge vnd gedinge so han ich Friderich Blarrer da vorgenemt fúr mich vnd fúr alle min erben min insigel gehenkt an disen brief. Der geben ist ze sant Gallen an dem na^ehsten fritag vor vnser fro^vwen tag ze der liehtmisse in dem jâr, do man zalt von Cristus gebúrt drúzehenhundert jâr, sibenzig jâr vnd darnach in dem fúnften jare.

Source Fulltext: Chartularium Sangallense IX, Nr. 5437, S. 112-113.